విధులకు గైర్హాజరు.. సంతకం మాత్రం హాజరు

అంగన్వాడీ టీచర్‌పై గ్రామస్తుల ఆగ్రహం

నూతనకల్,(విజయక్రాంతి): మండల పరిదిలోని పెద్దనేమిల గ్రామంలో అంగన్వాడీ కేంద్రం నిర్వహణపై గ్రామస్తులు తీవ్ర అసంతృప్తి వ్యక్తం చేస్తున్నారు.గ్రామస్తులు తెలిపిన వివరాల ప్రకారం గ్రామంలోని అంగన్వాడీ కేంద్రం-2కు చెందిన టీచర్, ఈ నెల 19 మరియు 20 తేదీల్లో సెలవు తీసుకున్నారు. ఈ మేరకు సూపర్వైజర్ అనుమతి పత్రాన్ని కేంద్రంలో ఉంచి ఆమె వేరే ఊరికి వెళ్లారు. అయితే, 19వ తేదీన తాను విధులకు హాజరైనట్లు ఆమె సంతకం చేసుకున్నట్లు గ్రామస్తులు గుర్తించారు.

కేవలం 20వ తేదీన మాత్రమే సీఎల్ (CL) పెట్టినట్లు రికార్డుల్లో ఉంది.​ఈ నెల 21న ఎటువంటి ముందస్తు సమాచారం లేకుండా, ఉన్నతాధికారుల అనుమతి తీసుకోకుండానే ఆ టీచర్ విధులకు గైర్హాజరయ్యారు. ఈ విషయంపై గ్రామస్తులు ఐసిడిఎస్ (ICDS) సూపర్వైజర్‌కు ఫోన్ చేసి ఆరా తీయగా, సదరు టీచర్ గైర్హాజరు గురించి తమకు ఎటువంటి సమాచారం లేదని అధికారులు స్పష్టం చేసినట్లు గ్రామస్తులు తెలిపారు.​ప్రస్తుతం ఈ అంగన్వాడీ కేంద్రం అద్దె భవనంలో కొనసాగుతోంది.

ఈ భవనానికి తగిన భద్రత లేదని, ఇలాంటి సమయంలో టీచర్ తరచూ విధులకు గైర్హాజరు కావడం వల్ల తమ పిల్లల రక్షణ పట్ల ఆందోళన చెందుతున్నామని తల్లిదండ్రులు ఆవేదన వ్యక్తం చేశారు. పిల్లల భద్రత విషయంలో సిబ్బంది పూర్తిగా విఫలమయ్యారని వారు విమర్శించారు.​ విధులకు హాజరుకాకుండానే సంతకం పెట్టిన అంగన్వాడీ టీచర్‌పై శాఖపరమైన చర్యలు తీసుకోవాలని గ్రామస్తులు డిమాండ్ చేశారు. ఈ కార్యక్రమంలో మస్కపురం వెంకన్న, గుర్రం వెంకన్న, చిప్పలపెళ్లి సందీప్, రాంబాబు, గుండగాని రమేష్‌లతో పాటు అంగన్వాడీ కేంద్రం లబ్ధిదారులు తదితరులు పాల్గొన్నారు.