సదరం సర్టిఫికెట్లు అక్రమాలపై ఫిర్యాదు
గరిడేపల్లి: సూర్యాపేట జిల్లా గరిడేపల్లి మండలం గానుగబండ గ్రామంలో సదరం సర్టిఫికెట్ల జారీ, పెన్షన్ల మంజూరులో అక్రమాలు జరుగుతున్నాయని గ్రామస్థులు ఆరోపిస్తున్నారు. వికలాంగులు, కళాకారుల పెన్షన్ల కోసం ఒక్కొక్కరి నుంచి రూ.40 వేల నుంచి రూ.70 వేల వరకు వసూలు చేశారని, వృద్ధాప్య పెన్షన్ల కోసం ఆధార్ కార్డుల్లో వయస్సు మార్పులు చేస్తున్నారని పేర్కొన్నారు. సుమారు 50 మంది దరఖాస్తు చేసుకోగా, 18 మంది వెరిఫికేషన్‌కు హాజరయ్యారని, వారిలో నలుగురి సర్టిఫికెట్లు నకిలీవిగా గుర్తించినట్లు తెలిసింది. దీనిపై సమగ్ర విచారణ జరిపి, బాధ్యులపై చర్యలు తీసుకోవాలని గ్రామస్థులు డిమాండ్ చేస్తున్నారు.
22-10-2026 | 08:30pm
