టెహ్రాన్: అమెరికా అధ్యక్షుడు డొనాల్డ్ ట్రంప్(US President Donald Trump) ప్రపంచానికి ఊరటనిచ్చే నిర్ణయం తీసుకున్నారు. రెండు వారాల కాల్పుల విరమణ(Ceasefire) ఒప్పందానికి ఇరాన్ అంగీకరించింది. పాకిస్థాన్ ప్రధాని షెహబాజ్‌ షరీఫ్‌(Pakistan Prime Minister Shehbaz Sharif) అభ్యర్థన మేరకు అమెరికాతో చర్చలకు అంగీకరిస్తున్నామని ఇరాన్ స్పష్టం చేసింది. ట్రంప్ తమ 10 సూత్రాల ప్రతిపాదనకు అంగీకరించాలని ఇరాన్ కోరింది. పాక్ అభ్యర్థనతో ట్రంప్ చేసిన ప్రకటనను పరిగణనలోకి తీసుకున్నామని ఇరాన్ తెలిపింది. అమెరికా, ఇజ్రాయెల్ దాడులు ఆపితేనే తాము ప్రతిదాడులు ఆపుతామని ఇరాన్ కండిషన్ పెట్టింది.

అమెరికాతో నేరుగా చర్చలు జరిపేందుకు ఇరాన్ అంగీకరించింది. ఇస్లామాబాద్ లో ఎల్లుండి అమెరికా-ఇరాన్ మధ్య చర్చలు జరగనున్నాయి. రెండు వారాల కాల్పుల విరమణ ఒప్పందానికి ఇజ్రాయెల్ అంగీకారం తెలిపింది. ఈ ఒప్పందం లెబనాన్ లో జరుగుతున్న ఇజ్రాయెల్ దాడులకూ వర్తిస్తుందని పాక్ పేర్కొంది. ఈ ఒప్పందం ప్రాంతీయ శాంతికి దోహదపడుతుందని పాకిస్థాన్ స్పష్టం చేసింది. హర్మూజ్ జలసంధి(Strait of Hormuz) ద్వారా 2 వారాల పాటు నౌకల రాకపోకలకు ఇరాన్ అనుమతించింది. హర్మూజ్ నుంచి రాకపోకలు తమ సైనిక పర్యవేక్షణలోనే జరుగుతున్నాయని ఇరాన్ వెల్లడించింది.