దేశ పాలనలో ఒక ప్రమాదకరమైనతత్వం బలపడిపోయింది. అధికారానికి సంబందించిన ఖాళీలు అత్యవసరం, ప్రజల జీవితాలకు సంబంధించిన ఖాళీలు ద్వితీయమైనవి. ఒక ప్రజా ప్రతినిధి మరణించినా లేదా రాజీనామా చేసినా ఆరు నెలలలోపే స్థానాన్ని భర్తీ చేయాలని రాజ్యాంగంలో ఉంటుంది. పాలకులు కూడా దీనిని ప్రజాస్వామ్య రక్షణగా ప్రకటిస్తారు. కానీ, అదే ప్రజాస్వామ్యానికి మూలాధారం అయిన పాఠశాలలు, కళాశాలలు, విశ్వవిద్యాలయాల్లో ఆధ్యాపకుల ఖాళీలు ఎందుకు భర్తీ చేయడం లేదన్నది ప్రశార్థకంగా మారింది.

గ్రామాల్లో రెవెన్యూ సిబ్బంది ఉండరు. ఆసుపత్రుల్లో డాక్టర్లు కనిపించరు, కోర్టుల్లో న్యాయ సహాయకులు అందుబాటులో ఉండరు. ఇది ప్రజాస్వామ్య విలువల పతనమని చెప్పొచ్చు. ప్రభుత్వాలు జీడీపీ గురించి గొప్పగా మాట్లాడతాయి. కానీ, జీడీపీ అనేది పాలకుల సంపద కాదు, కార్పొరేట్ లాభాల మొత్తం కాదు. అది ప్రజల ఉత్పాదక శక్తి ప్రతిబింబం. ప్రజలకు ఉపాధి లేకుండా, కొనుగోలు శక్తి లేకుండా, సరైన ఆర్థిక భద్రత లేకుండా ఏ దేశం నిజంగా అభివృద్ధి చెందలేదు.

తెలంగాణలో బీఆర్‌ఎస్‌ను పడగొట్టి అధికారంలోకి వచ్చిన కాంగ్రెస్ ప్రభుత్వం ‘లక్ష ఉద్యోగాల భర్తీ’ అని ఊదరగొట్టింది. కానీ వరుస ఎన్నికలు రావడం, ఎన్నికల కోడ్ అమల్లో ఉందన్న సాకుతో నియామకాలు పక్కనబెట్టింది. మూడు, నాలుగు నెలల్లో రాష్ట్రంలో అన్ని ఎన్నికలు పూర్తవనున్నాయి. దీంతో ఉద్యోగాలను భర్తీ చేసి మాట నిలుపుకుంటుందా లేక తప్పించుకునే ప్రయత్నం చేస్తుందా అన్నది చూడాలి.

 అనిరుధ్, నల్లగొండ