భారత్-పాక్ సరిహద్దుల్లో తెలంగాణ వాసి అరెస్ట్

న్యూఢిల్లీ: భారత్-పాకిస్థాన్ సరిహద్దులో(India Pakistan border) తెలంగాణ వాసి అరెస్ట్ అయ్యాడు. జైసల్మేర్ జిల్లాలో మొహమ్మద్ అష్ఫాక్ హుస్సేన్ (38) ను అదుపులోకి తీసుకున్నారు. హుస్సేన్ భారత్- పాక్ సరిహద్దుల్లోని జైసల్మేర్ జిల్లా, మ్యాజలార్ వద్ద నిషేధిత ప్రాంతంలో అనుమానాస్పదంగా తిరుగుతూ పట్టుబడ్డాడు. అష్పాక్ హుస్సేన్ ను అదుపులోకి తీసుకున్న స్థానికులు అతన్ని ప్రశ్నించారు. పొంతనలేని సమాధానాలు చెప్పడంతో భద్రతా దళానికి సమాచారం ఇచ్చారు. 

సంఘటనా స్థలానికి చేరుకున్న బీఎస్ఎఫ్ బృందం ఆ యువకుడిని అదుపులోకి తీసుకుని, అతని వద్ద నుండి భారతీయ పాస్‌పోర్ట్‌ను స్వాధీనం చేసుకుంది. అష్పాక్ జైసల్మేర్ కు ఎందుకు వచ్చాడని బీఎస్ఎఫ్ దర్యాప్తు చేస్తోంది. సున్నితమైన సరిహద్దు ప్రాంతంలోకి మరొక రాష్ట్రం నుండి ఒక వ్యక్తి అనధికారికంగా ప్రవేశించడం భద్రతా సంస్థలను ఆందోళన కలిగిస్తోంది. ఆ యువకుడు తెలంగాణ నుండి జైసల్మేర్ మారుమూల సరిహద్దు ప్రాంతానికి ప్రయాణించిన పరిస్థితులను పరిశీలిస్తున్నారు. అతనికి ఏదైనా స్థానిక సంబంధాలు ఉన్నాయా లేదా ఇతర కారణాలు ఉన్నాయా అనే దానిపై కూడా వారు దర్యాప్తు చేస్తున్నామని అధికారులు వెల్లడించారు.