చురచంద్‌పూర్ జిల్లాలో షట్‌డౌన్

ఇంఫాల్: మణిపూర్‌ రాష్ట్రంలో ప్రభుత్వం ఏర్పాటులో తమ వర్గానికి చెందిన ఒక ఎమ్మెల్యే పాల్గొనడాన్ని నిరసిస్తూ రెండు గిరిజన సంఘాలు కుకీ-జో ఆధిపత్యం ఉన్న జిల్లాలో 'సంపూర్ణ బంద్‌'కు పిలుపునివ్వడంతో మణిపూర్‌లోని చురాచంద్‌పూర్ జిల్లాలో(Churachandpur district) సాధారణ జనజీవనం స్తంభించిపోయిందని అధికారులు తెలిపారు. శుక్రవారం ఉదయం, కర్రలు పట్టుకున్న బంద్ మద్దతుదారులు జిల్లా కేంద్ర పట్టణంలోని కొన్ని ప్రాంతాల్లో వాహనాలను అడ్డుకున్నారు. మార్కెట్లు మూసివేయబడ్డాయి.

వాహనాలు రోడ్లపైకి రాలేదు, విద్యా సంస్థలు, ప్రభుత్వ కార్యాలయాలు కూడా మూతపడ్డాయని అధికారులు వెల్లడించారు. కొత్త ఉప ముఖ్యమంత్రి ప్రమాణ స్వీకారాన్ని వ్యతిరేకిస్తూ నిరసనకారులు వీధుల్లోకి రావడంతో చురాచంద్‌పూర్‌లో హింసాత్మక ఘర్షణలు చెలరేగాయి. తుయిబాంగ్ బజార్ సమీపంలో భద్రతా బలగాలపై రాళ్ల దాడి, నిప్పుపెట్టే సంఘటనలు జరిగాయి. కొత్త ప్రభుత్వంలో చేరిన శాసనసభ్యులను సామాజికంగా బహిష్కరించాలని స్థానిక బృందాలు పిలుపునిచ్చాయి. జిల్లా వ్యాప్తంగా సంపూర్ణ బంద్ పాటించడంతో పరిస్థితి ఉద్రిక్తంగా మారింది.