బోడుప్పల్ సుద్దకుంట భూ వివాదం

1. కూల్చివేతల తర్వాత మళ్లీ కబ్జా?
2. హైడ్రా, ఇరిగేషన్, రెవెన్యూ, మున్సిపల్ శాఖల పనితీరుపై విమర్శలు
3. శాఖల మధ్యన సమన్వయ లోపం 
4. అక్రమ నిర్మాణాలపై చర్యలు ఎక్కడ?
5. చెరువు శిఖం భూమి పరిరక్షణకు చర్యలు తీసుకోవాలని ప్రజల డిమాండ్

మేడిపల్లి, జూలై 10 (విజయక్రాంతి) : మల్కాజిగిరి మున్సిపల్ కార్పొరేషన్ పరిధిలోని బోడుప్పల్ సర్కిల్లో ఉన్న సుద్దకుంట చెరువు శిఖం భూమిగా స్థానికులు పేర్కొంటున్న ప్రాంతంలో మరోసారి నిర్మాణ కార్యకలాపాలు కొనసాగుతున్నాయనే ఆరోపణలు చర్చనీయాంశంగా మారాయి. గతంలో ఇదే ప్రాంతంలో అక్రమ నిర్మాణాలపై అధికారులు కూల్చివేత చర్యలు చేపట్టినప్పటికీ, ఇప్పుడు మళ్లీ నిర్మాణాలు జరుగుతున్నాయని స్థానికులు అంటున్నారు.

ఈ నేపథ్యంలో చెరువు శిఖం భూమి రక్షణపై సంబంధిత శాఖల పనితీరుపై ప్రశ్నలు తలెత్తుతున్నాయి. హైడ్రా, ఇరిగేషన్, రెవెన్యూ, మున్సిపల్ శాఖల మధ్య సమన్వయం లోపించడంతోనే ఈ పరిస్థితి ఏర్పడిందని స్థానికులు అభిప్రాయపడుతున్నారు. ఏశాఖ చర్యలు తీసుకోవాలనే విషయంలో స్పష్టత లేకపోవడంతో సమస్య మరింత క్లిష్టంగా మారిందని వారు చెబుతున్నారు. అక్రమ నిర్మాణాలపై ఫిర్యాదులు చేసినప్పటికీ ఆశించిన స్థాయిలో స్పందన లేదని స్థానికులు అసంతృప్తి వ్యక్తం చేస్తున్నారు.

సంబంధిత అధికారులు ఒకరిపై ఒకరు బాధ్యతలు నెట్టుకుంటూ కాలయాపన చేస్తున్నారనే విమర్శలు వినిపిస్తున్నాయి. ఈ వ్యవహారంలో కొందరు అధికారులపై అవినీతి ఆరోపణలు కూడా వ్యక్తమవుతున్నాయి. అయితే ఈ ఆరోపణలకు సంబంధించి ఇప్పటివరకు ఎలాంటి అధికారిక నిర్ధారణ వెలువడలేదు. అందువల్ల ఈ అంశంపై స్వతంత్రంగా, పారదర్శకంగా విచారణ నిర్వహించి వాస్తవాలను ప్రజలకు తెలియజేయాలని స్థానికులు డిమాండ్ చేస్తున్నారు.

చెరువు శిఖం భూమి హద్దులను సంబంధిత శాఖలు సంయుక్తంగా పరిశీలించి, ప్రభుత్వ భూమిపై ఎలాంటి అక్రమ నిర్మాణాలు జరుగుతున్నట్లు తేలితే వెంటనే నిలిపివేయడంతో పాటు బాధ్యులపై చట్టపరమైన చర్యలు తీసుకోవాలని స్థానికులు కోరుతున్నారు. అలాగే ఈ వివాదంపై హైడ్రా, ఇరిగేషన్, రెవెన్యూ, మున్సిపల్ శాఖల అధికారులు అధికారికంగా స్పందించి వాస్తవ పరిస్థితిని ప్రజలకు వివరించాలని స్థానికులు విజ్ఞప్తి చేస్తున్నారు. సుద్దకుంట భూమి వ్యవహారంపై సమగ్ర విచారణ జరిపి ప్రభుత్వ భూములను పరిరక్షించాలని ప్రజలు కోరుతున్నారు.