'త్రికాల’ రొటీన్ హారర్ సినిమా కాదు.. అంతకు మించి!

మూవీ రివ్యూ: 

సినిమా పేరు: త్రికాల

నటీనటులు: శ్రద్ధాదాస్, మాస్టర్ మహేంద్రన్, అజయ్, ఆమని, సాహితి అవంచ, ప్రభాకర్, అంబటి అర్జున్, రౌడీ రోహిణి తదితరులు 

డీవోపీ: పవన్ చెన్న

సంగీతం: హర్షవర్ధన్ రామేశ్వర్

నేపథ్య సంగీతం: షాజిత్ హుమాయున్

సమర్పణ: చాగంటి ప్రొడక్షన్ ఎల్‌ఎల్‌పీ 

నిర్మాతలు: రాధిక–శ్రీనివాస్

కథ, దర్శకత్వం: మణి తెల్లగూటి

విడుదల తేదీ: 28-05-2026

టాలీవుడ్‌లో కొత్త తరహా మైథలాజికల్ డార్క్ థ్రిల్లర్‌గా ప్రేక్షకుల ముందుకు వచ్చిన తాజా చిత్రం ‘త్రికాల’. 'ఎ స్క్రిప్ట్ ఆఫ్ గాడ్' అనేది ఉప శీర్షిక. కర్మ సిద్ధాంతం, పునర్జన్మ, తాంత్రిక శక్తులు, మానసిక భయం, మానవ భావోద్వేగాలను ఒకే కథలో మిళితం చేసి, విజువల్ వండ‌ర్‌ గా తెరకెక్కించారు దర్శకుడు మణి తెల్లగూటి. చాగంటి ప్రొడ‌క్ష‌న్‌ బ్యానర్‌పై రూపొందిన ఈ సినిమా గురువారం థియేట‌ర్లలో విడుద‌లైంది. టీజర్, ట్రైలర్, పోస్టర్లు చూస్తే.. ‘తుంబాడ్’, ‘కాంతార’ తరహా డార్క్ మిస్టిక్ వరల్డ్‌ను గుర్తు చేసిన ఈ చిత్రం ప్రేక్షకులకు ఏ మేరకు అలరిస్తోంది? రివ్యూ రిపోర్టులో చూద్దాం.. 

కథ ఏంటి? 

శ‌తాబ్దాల క్రితం 'కుమారి ఖండం' అనే ఒక పౌరాణిక భూభాగంలో కథ ప్రారంభమవుతుంది. అక్కడి మునులు అత్యంత శక్తిమంతమైన తాంత్రిక గ్రంథాలు, ప్రాచీన సాంకేతిక రహస్యాలను అసురుల చేతికి చిక్కకుండా రహస్య ప్రదేశంలో దాచిపెడతారు. ఆ రహస్యాలను కాపాడేందుకు 'శక్తి ఏథా' అనే దైవిక ఆయుధాన్ని సృష్టించి, దానిని వీరరాజు త్రికాల వర్మకు అప్పగిస్తారు. అసుర శక్తులపై పోరాడుతూ అతడు మరణించగా, రుషులు అతని ఆత్మను ఒక మాయా అండంలో బంధిస్తారు. కలియుగంలో ప్రపంచానికి భారీ ముప్పు వచ్చినప్పుడు ఆ ఆత్మ మళ్లీ మేల్కొంటుందని వారు చెబుతారు. 

ఇక ఈ కథ వర్తమానంలోకి మారిన తర్వాత శివ (మాస్టర్ మహేంద్రన్) అనే యువకుడు అదృశ్యమైన తన ప్రేయసి నిధి (సాహితి) కోసం నగరం చేరుకుంటాడు. అతని దగ్గర ఒక దుష్టశక్తి ఆవహించిన ఓ మొబైల్‌ ఫోన్‌ ఉంటుంది. ఈ క్రమంలో అతనికి వైతరణ్ (అజయ్) అనే విచిత్రమైన వ్యక్తి గురించి తెలుస్తుంది. సూర్యరశ్మిని తట్టుకోలేని ‘పోర్ఫిరియా’ వ్యాధితో బాధపడుతున్న ఈ వైతరణ్ని ఎవరో కాదు.. అతను పునర్జన్మ ఎత్తిన త్రికాలవర్మనే. కుటుంబ సంఘర్షణలు, మానసిక వేదనలతో అతను తన తండ్రిని, పినతల్లి (ఆమని)ని హత్య చేసి ఆత్మహత్య చేసుకుంటాడు. కానీ అతని ఆత్మ ఒక భయానక బంగళాలోనే సంచరిస్తూ ఉంటుంది.

సైకియాట్రిస్ట్ మాయ (శ్రద్ధా దాస్) అనుకోకుండా ఆ బంగళాలో చిక్కుకుపోతుంది. మరోవైపు అసుర రాజు తిరిగి భూమిపై ఆధిపత్యం సాధించేందుకు మేల్కొంటాడు. అప్పుడు దర్వాడి తాంత్రిక తెగ ఆ మాయా అండాన్ని యాక్టివేట్ చేసి, త్రికాలవర్మ ఆత్మను తిరిగి ఎలా మేల్కొలిపింది? శివకు ఈ కథతో ఉన్న సంబంధమేంటి? చివరకు అసుర శక్తులపై విజయం సాధించారా? అనేదే సినిమా అసలు కథ.

మెప్పించే అంశాలివే.. 

ఈ సినిమాలో అత్యంత బలమైన అంశం దాని కాన్సెప్ట్. కర్మ సిద్ధాంతాన్ని కేవలం డైలాగ్స్ రూపంలో కాకుండా, పాత్రల మానసిక స్థితి, వారి గతం, పునర్జన్మల ద్వారా చూపించిన తీరు ఆకట్టుకుంటుంది. పౌరాణికతను ఆధునిక ప్రపంచంతో మిళితం చేయడం సినిమాకున్న ప్రధాన బలం. ముఖ్యంగా వైతరణ్ పాత్ర సినిమాకు ప్రధాన ఆకర్షణ. సూర్యకాంతిని తట్టుకోలేని ఒక మనిషి, మానసిక ఒత్తిడి, అంతర్మథనం, భయం, దుష్టశక్తి మధ్య చిక్కుకున్న పాత్రలో అజయ్ అద్భుతమైన నటనను కనబర్చాడు. అతని కోసం ప్రత్యేకంగా రూపొందించిన మాస్క్‌లు, కాస్ట్యూమ్స్, డార్క్ విజువల్ ట్రీట్‌మెంట్ చాలా కొత్తగా ఉన్నాయి. 

కథానాయకుడు మాస్టర్ మహేంద్రన్ ఈ సినిమాలో చాలా నేచురల్ పెర్ఫార్మెన్స్ ఇచ్చాడు. అమాయకత్వం, ప్రేమ, భయం, భావోద్వేగం.. ఇలా విభిన్నమైన భావోద్వేగాలను చాలా ఈజ్‌తో చూపించాడు. ముఖ్యంగా క్లైమాక్స్ వైపు వచ్చే భావోద్వేగ సన్నివేశాల్లో ఆయన నటన బాగా కనెక్ట్ అవుతుంది. 

శ్రద్ధా దాస్ ఈ సినిమాకు మ‌రో హైలైట్‌. త‌న‌ పాత్రలో గ్లామర్ కంటే మిస్టరీ ఎక్కువగా కనిపిస్తుంది. సైకియాట్రిస్ట్ పాత్రలో చాలా కంట్రోల్డ్ పెర్ఫార్మెన్స్ ఇచ్చింది. ఆమె స్క్రీన్ ప్రెజెన్స్ సినిమాకు స్పెష‌ల్ డార్క్ టోన్ తీసుకొచ్చింది. ముఖ్యంగా భయానక, భావోద్వేగభరిత సన్నివేశాల్లో ఆమె నటన ఆకట్టుకుంటుంది. 

సీనియర్ నటి ఆమని పాత్ర కూడా సినిమాకు కీలకం. అమ్మతనంతోపాటు భయం, బాధ, అనుమానం వంటి భావోద్వేగాలను ఆమె చాలా సహజంగా పలికించింది. ఆమె పాత్ర కథలో భావోద్వేగ బలాన్ని పెంచుతుంది. ఆమని నట‌నానుభవం ప్రతి సీన్‌లో కనిపిస్తుంది.

మేకింగ్‌.. టేకింగ్‌

తెలుగు సినీ పరిశ్రమలో ఇప్పుడు 'టెక్నికల్ ఫిల్మ్ మేకర్'గా మణి తెల్లగూటి పేరు వినిపించడం యాదృచ్ఛికం కాదు. ఆయన దర్శకత్వం ఈ సినిమాలో చాలా స్పష్టంగా కనిపిస్తుంది. సాధారణ దర్శకులు షూటింగ్ తర్వాత వీఎఫ్‌ఎక్స్‌ గురించి ఆలోచిస్తే, మణి మాత్రం కథ రాసే దశ నుంచే ప్రతి ఫ్రేమ్‌ను విజువల్‌గా డిజైన్ చేసినట్లు ఈ సినిమా చూస్తే తెలుస్తుంది. ఈ సినిమాలో ప్రతి షాట్‌కు ఒక ప్రత్యేకమైన 'డార్క్ విజువల్ లాంగ్వేజ్' ఉంది. మైథాలజీ, తాంత్రిక శక్తులు, సైకాలజికల్ హారర్ అంశాలను ఒకే ప్రపంచంగా చూపించేందుకు ఆయన ఎంచుకున్న ఫ్రేమింగ్ స్టైల్ ప్రత్యేకంగా నిలుస్తుంది. బ్యాక్‌గ్రౌండ్‌లో కనిపించే నీడలు, ఖాళీ కారిడార్లు, మసక వెలుతురు, నెమ్మదిగా కదిలే కెమెరా కూడా సినిమాపై ఉత్కంఠ‌త‌, ఆస‌క్తి పెంచుతూ ఉంటుంది. దర్శకుడి విజన్ వల్లే ఈ సినిమా ఒక 'డార్క్ మిస్టిక్ యూనివర్స్'లా అనిపిస్తుంది. ఎడిటింగ్ విషయంలో కూడా మణి పని చాలా భిన్నంగా ఉంది. సాధారణ కమర్షియల్ కట్‌లకు బదులుగా, సౌండ్ డిజైన్, విజువల్ రిథమ్‌కు ప్రాధాన్యం ఇచ్చే సినిమాటిక్ కటింగ్ విధానం వాడినట్లు తెలుస్తోంది. అందుకే ట్రైలర్‌లోని ప్రతి షాట్ థియేటర్లలో ప్ర‌త్యేక‌మైన‌ అనుభూతిని కలిగిస్తుంది.

ఇంకా ప్రత్యేకంగా చెప్పుకోవాల్సిన విషయం ఏమిటంటే, భారీ సెట్లు లేకపోయినా, ఫ్రేమ్ కంపోజిషన్, డిజిటల్ ఎక్స్‌టెన్షన్స్, సీజీఐ బ్యాక్‌డ్రాప్స్ ద్వారా గ్రాండ్ విజువల్ స్కేల్ తీసుకురావడం దర్శకుడి ప్రధాన బలం. చాలా సన్నివేశాల్లో 'హాలీవుడ్ డార్క్ ఫాంటసీ' తరహా విజువల్ టోన్ కనిపిస్తుంది. 

సాంకేతిక విలువల గురించి... 

సమకాలీన తెలుగు సినిమాలో సరికొత్త విజువల్ స్టైల్‌ను తీసుకొస్తున్న సినిమాటోగ్రాఫర్లలో పవన్ చెన్నా ఒకరు. ఆయ‌న కెమెరా కేవలం పాత్రల‌నే కాదు, ప్రతి ఫ్రేమ్ ద్వారా భావోద్వేగాన్ని పలికిస్తుంది. పవన్ చెన్నా విజువల్స్ ఈ సినిమాను మరో స్థాయికి తీసుకెళ్లాయి. పౌరాణిక ప్రపంచం, చీకటి బంగళాలు, తాంత్రిక శక్తులు, ఆధ్యాత్మిక యుద్ధాలను చూపించేందుకు ఆయన వాడిన లైటింగ్ స్టైల్ అద్భుతంగా ఉంది. డార్క్ ఇంక్-బ్లాక్ టోన్స్ మధ్య గోల్డెన్ లైట్ బీమ్స్ ఉపయోగించడం వల్ల సినిమాలో ఒక మిస్టిక్ ఫీల్ వచ్చింది. ప్రతి ఫ్రేమ్ ఒక పెయింటింగ్‌లా కనిపించేలా కంపోజ్ చేయడం సినిమాకు హాలీవుడ్ స్థాయి విజువల్ ఫీల్ తీసుకొచ్చింది. వైతరణ్ పాత్రకు సంబంధించిన సన్నివేశాల్లో షాడోస్‌ను వాడిన తీరు, పురాతన గుహల్లో తీసిన వైడ్ షాట్స్, మసక వెలుతురులో కనిపించే దేవాలయ సెట్లు, బంగ్లా కారిడార్లు.. ఇవన్నీ మ‌న‌ల్ని వెంటాడే దృశ్యాలుగా నిలిచిపోతాయి. ముఖ్యంగా హారర్ సీన్లలో కెమెరా మూమెంట్స్ చాలా స్లోగా, అన్‌కంఫర్టబుల్ ఫీలింగ్ వచ్చేలా డిజైన్ చేయడం వల్ల ప్రేక్షకుడు కూడా ఆ భయాన్ని అనుభూతి చెందుతాడు. కొన్ని సన్నివేశాల్లో కేవలం లైటింగ్‌తోనే టెన్షన్‌ను క్రియేట్ చేసిన తీరు ఆకట్టుకుంటుంది. పవన్ చెన్నా ప్రత్యేకత ఏమిటంటే, తక్కువ బడ్జెట్ ఫ్రేమ్‌ను కూడా రిచ్ విజువల్‌గా మార్చగల సామర్థ్యం. అందుకే ఈ సినిమా పోస్టర్లు, టీజర్, ట్రైలర్ అన్నింటిలోనూ 'బిగ్ స్క్రీన్ విజువల్ ఎక్స్‌పీరియన్స్' ఫీల్ స్పష్టంగా కనిపిస్తోంది. 

సంగీతం గురించి... 

‘అర్జున్ రెడ్డి’, ‘యానిమల్’ ఫేమ్ హర్షవర్ధన్ రామేశ్వరం అందించిన సంగీతం సినిమాకు ప్రధాన బలం. మెయిన్ హైలైట్ గా నిలిచి సినిమాను మరోస్థాయిలో నిలబెట్టింది. షాజిత్‌ హుమాయున్‌ అందించిన నేపథ్య సంగీతం కూడా సినిమాకు ప్రాణం పోసింది. ముఖ్యంగా హారర్, తాంత్రిక సీన్ల‌లో బీజీఎం భయాన్ని మరింత పెంచింది. కొన్ని సీన్ల‌లో మ్యూజిక్ కంటే సౌండ్ డిజైన్‌నే ఎక్కువగా ఉపయోగించడం మ‌రింతా ఎఫెక్టివ్‌గా అనిపిస్తుంది. 

సాంకేతికత అంశాలు.. 

ఈ సినిమాలో వీఎఫ్‌ఎక్స్‌ చాలా కీలక పాత్ర పోషించింది. మాయా అండం, అసుర శక్తులు, ఆధ్యాత్మిక యుద్ధాలు, ప్రాచీన ప్రపంచాల డిజైన్.. ఇలా విజువ‌ల‌న్నీ రిచ్‌గా కనిపిస్తాయి. సీజీఐని అతిగా కాకుండా కథలో భాగంలా ఉపయోగించడం కలిసి వచ్చింది.  ప్రత్యేకంగా ఇంట‌ర్వెల్ బ్లాగ్‌లో వచ్చే వీఎఫ్‌ఎక్స్‌  సీక్వెన్స్ థియేటర్లలో ప్రేక్షకులను ఆశ్చర్యపరచేలా ఉంటుంది. ప్రాక్టికల్ లైటింగ్, సీజీఐ బ్లెండ్‌ గురించి కూడా ప్రత్యేకంగా చెప్పుకోవాలి. అంటే ఒకే షాట్‌లో అసలు లైటింగ్ (షూటింగ్ స్పాట్‌లోని లైట్లు), కంప్యూటర్-జనరేటెడ్ లైటింగ్ (జీసీఐ).. రెండింటినీ అతుకులు లేకుండా కలపడం వల్ల సినిమాకు మరింత రియలిస్టిక్ ఫీల్ తెచ్చింది. 

నిర్మాణ విలువలు ఎలా ఉన్నాయంటే..? 

నిర్మాత రాధికా శ్రీనివాస్ ఈ సినిమాను చాలా రిచ్ ప్రొడక్షన్ వాల్యూస్‌తో నిర్మించారు. స్క్రీన్‌పై ప్రతి ఫ్రేమ్‌లోనూ క్వాలిటీ కనిపించేలా ఎక్కడా రాజీ పడకుండా తెరకెక్కించిన తీరు స్పష్టంగా తెలుస్తోంది. ముఖ్యంగా సెట్స్, కాస్ట్యూమ్స్, వీఎఫ్‌ఎక్స్‌, కలర్ టోన్, టెక్నికల్ స్టాండర్డ్స్.. అన్నీ క‌లిపి సినిమాకు హై బడ్జెట్ థియేట్రికల్ ఫీల్ తీసుకొచ్చాయి. కొత్త కాన్సెప్ట్‌లను నమ్మి ఇలాంటి విజువల్ డ్రివెన్ సినిమాను నిర్మించడం నిర్మాత అభిరుచిని చూపిస్తుంది. మొత్తంగా చెప్పాలంటే.. 'త్రికాల’ రొటీన్ హారర్ సినిమా కాదు. ఇది మైథాలజీ, సైకాలజికల్ హారర్, డార్క్ ఫాంటసీ, విజువల్ థ్రిల్లర్‌ల మేళవింపు. స్టోరీ, విజువల్స్, బీజీఎం, టెక్నికల్ ఎగ్జిక్యూషన్.. ఇవ‌న్నీ క‌లిపి ఈ సినిమాను ప్రత్యేకంగా నిలబెట్టాయి. 

చివరగా.. 

పౌరాణిక రహస్యాలు.. కర్మ సిద్ధాంతం.. డార్క్ ఫాంటసీ.. హాలీవుడ్ స్థాయి విజువల్స్ కలయికగా 'త్రికాల’ను చెప్పుకోవ‌చ్చు. పౌరాణిక రహస్యాలు, ఆధ్యాత్మిక కాన్సెప్ట్స్, హాలీవుడ్ తరహా డార్క్ విజువల్ అనుభూతిని ఇష్టపడే ప్రేక్షకులు ఈ సినిమాను చూడొచ్చు. 

రేటింగ్: 2.75/5