ఘట్ కేసర్ సర్కిల్‌లో ప్రత్యేక డ్రైవ్

పనికిరాని వాహనాల తొలగింపు

ఘట్ కేసర్, ఫిబ్రవరి 23 (విజయక్రాంతి) : మల్కాజిగిరి మున్సిపల్ కార్పొరేషన్ పరిధిలోని ఘట్ కేసర్ సర్కిల్లో రహదారులపై నిర్లక్ష్యంగా విడిచిపెట్టబడిన, పనికిరాని, వినియోగంలో లేని వాహనాల వల్ల ట్రాఫిక్కు అంతరాయం కలగడం, పారిశుధ్య సమస్యలు ఏర్పడటం, ప్రజలకు అసౌకర్యం కలగడం వంటి అంశాలను దృష్టిలో ఉంచుకుని డిప్యూటీ కమిషనర్ ఎ. వాణి ఆదేశాల మేరకు సోమవారం పోచారం డివిజన్ 8 లో ప్రత్యేక డ్రైవ్ నిర్వహించబడింది.

ఈ డ్రైవ్లో భాగంగా వివిధ కాలనీలు, ప్రధాన రహదారులు, అంతర్గత వీధుల్లో దీర్ఘకాలంగా నిల్వ ఉన్న అబాండన్డ్ వాహనాలను గుర్తించి వాటిని లిఫ్టింగ్ చేసి సంబంధిత యార్డుకు తరలించడం జరిగింది. రహదారులపై పనికిరాని వాహనాలను విడిచి పెట్టవద్దని, ఇటువంటి వాహనాలను స్వయంగా తొలగించని యజమానులపై జరిమానాలు విధించబడతాయని అధికారులు హెచ్చరించారు. ప్రజలు తమ వాహనాలను రహదారులపై నిర్లక్ష్యంగా వదిలివేసిన, వినియోగంలో లేని వాహనాలను తొలగించి పట్టణ శుభ్రత, ట్రాఫిక్ సౌకర్యానికి సహకరించాలని డిప్యూటీ కమిషనర్ ఎ. వాణి విజ్ఞప్తి చేశారు.