వేసవిలో సూర్యకిరణాల వల్ల చర్మం పొడిబారుతుంది. చర్మం జిడ్డుగా మారడం వల్ల మొటిమల సమస్య కూడా పెరుగుతుంది. చర్మంపై ట్యాన్ ఏర్పడి ఆ ప్రాంతం డల్‌గా మారుతుంది. వేసవిలో కూడా చర్మం మెరిసేలా ఉండాలంటే కొన్ని ప్రత్యేక జాగ్రత్తలు తీసుకోవాలి. అవేంటంటే..

వేసవిలో శరీరాన్ని హైడ్రేటెడ్‌గా ఉంచడానికి నీరు ఎక్కువగా తాగాలి. దీనివల్ల శరీరంలోని టాక్సిన్స్ బయటకు వెళ్లిపోతాయి. నీళ్లతో పాటు ఫ్రూట్ జ్యూస్, పుచ్చకాయ, దోసకాయ వంటి పండ్లను కూడా తినవచ్చు. 

సన్‌స్క్రీన్ లేకుండా ఎండలో బయటకు వెళ్లకూడదు. సన్‌స్క్రీన్ చర్మానికి హానితలపెట్టే యూవీ కిరణాల నుంచి రక్షిస్తుంది. అలాగే ట్యాన్, సన్ బర్న్ సమస్యలను నివారిస్తుంది. వేసవిలో మాయిశ్చరైజర్ అప్లు చేయడం మర్చిపోకూడదు. చర్మం తేమను కాపాడుకోవడానికి మాయిశ్చరైజర్ ఉపయోగపడుతుంది. ఇది వృద్ధాప్య సంకేతాలను కూడా దూరం చేస్తుంది. నూనె లేని మాయిశ్చరైజర్ ఉపయోగించడం మంచిది. 

వేసవిలో చెమటలు పట్టడం సహజం. దాన్ని వెంటనే శుభ్రం చేయకపోతే చర్మ సమస్యలు పెరుగుతాయి. కాబట్టి క్రమం తప్పకుండా రెండు, మూడు సార్లు ముఖాన్ని శుభ్రం చేసుకోవాలి. దీనివల్ల చర్మంపై పేరుకుపోయిన మురికి, నూనె, క్రిములు పోయి చర్మం తాజాగా కనిపిస్తుంది. అలాగే ఓపెన్ పోర్స్, జిడ్డు చర్మం, మొటిమల సమస్యలు వేసవిలో పెరుగుతాయి. వీటిని వదిలించుకోవడానికి చర్మాన్ని ఎక్స్‌ఫోలియేట్ చేయాలి. తేలికపాటి ఎక్స్‌ఫోలియేట్ ఉపయోగించి చర్మాన్ని స్క్రబ్ చేసుకోవాలి. ఇది చర్మాన్ని చాలా సున్నితంగా, కాంతివంతంగా మారుస్తుంది. 

ఫ్రీ రాడికల్స్ నుంచి చర్మాన్ని రక్షించడానికి యాంటీ ఆక్సిడెంట్స్ అధికంగా ఉండే ఆహారాన్ని తీసుకోవాలి. విటమిన్ సి, విటమిన్ ఇ సమృద్ధిగా ఉన్న ఆహారాలు చర్మం ఆరోగ్యంగా ఉండేలా చేస్తాయి. ఏడు నుంచి ఎనిమిది గంటల పాటు నిద్ర పోవాలి. మొత్తం ఆరోగ్యాన్ని మెరుగుపరచడంతో పాటు, చర్మ సమస్యలను తగ్గించడంలో కూడా నిద్ర సహాయపడుతుంది.