భూత్నాల్ సరస్సులో ఆరు మృతదేహాలు లభ్యం

విజయపుర: కర్నాటక రాష్ట్రం విజయపురలోని భూత్నాల్ సరస్సులో(Bhutnal Lake) ఇద్దరు బాలురతో సహా ఆరుగురి మృతదేహాలు తేలుతూ కనిపించాయని పోలీసులు బుధవారం తెలిపారు. మృతుల్లో నలుగురు మహిళలు, ఇద్దరు బాలుర మృతదేహాలను వెలికితీశామని, ఈ మరణాలకు దారితీసిన పరిస్థితులు ఇంకా తెలియరాలేదని పోలీసులు పేర్కొన్నారు. సరస్సును చూసేందుకు వస్తున్నప్పుడు వారు జారి అందులో పడిపోయి ఉండవచ్చని పోలీసులు అనుమానం వ్యక్తం చేస్తున్నారు. జిల్లా అగ్నిమాపక అధికారి శశిధర్ మాట్లాడుతూ, "ఇక్కడి సరస్సులో ఆరుగురు వ్యక్తులు పడిపోయినట్లు మాకు సమాచారం అందింది. మేము అక్కడికి చేరుకున్నప్పుడు ఆరు మృతదేహాలు నీటిపై తేలుతూ కనిపించాయి. ఆ మృతదేహాలను పోలీసులకు అప్పగించాము. మృతదేహాలు కుళ్ళిన స్థితిలో ఉన్నప్పటికీ, వాటిని గుర్తించే వీలుంది" అని తెలిపారు.

డిప్యూటీ ఎస్పీ నాగరాజ్, ఆదర్శ్ నగర్ పోలీస్ స్టేషన్(Adarsh ​​Nagar Police Station) పిఎస్‌ఐ సీతారాం, ఇతర సిబ్బంది ఆ ప్రదేశాన్ని సందర్శించారు. మరణించిన వారి వివరాలు తెలియరాలేదని పోలీసులు తెలిపారు. ఆత్మహత్య, ప్రమాదవశాత్తు నీటిలో మునిగిపోవడం వంటి అనేక కోణాలను పరిశీలిస్తున్నట్లు పోలీసులు తెలిపారు. ఇటీవల ఎవరైనా వ్యక్తులు కనిపించకుండా పోయినట్లు ఏదైనా కుటుంబం ఫిర్యాదు చేసిందేమోనని పరిశీలిస్తున్నామని, అటువంటి ఫిర్యాదుల నుండి సమాచారాన్ని సేకరిస్తున్నామని పోలీసులు తెలిపారు. పోస్ట్‌మార్టం పరీక్షల తర్వాత మరణాలకు గల కారణాలు, పరిస్థితులు మరింత స్పష్టమవుతాయని అధికారులు పేర్కొన్నారు.