రామగుండంలో కలకలం

ఫుడ్ పాయిజన్‌తో 11 మంది మెడికల్ విద్యార్థులు అస్వస్థత

గోదావరిఖని,(విజయక్రాంతి): పెద్దపల్లి జిల్లా రామగుండంలోని సింగరేణి మెడికల్ కళాశాలలో (CHMS) చదువుతున్న 11 మంది విద్యార్థులు ఫుడ్ పాయిజన్‌కు గురై అస్వస్థతకు లోనైన ఘటన స్థానికంగా కలకలం రేపింది.

జరిగిందేమిటంటే

కళాశాలకు చెందిన విద్యార్థులు తమ సహ విద్యార్థి పుట్టినరోజు వేడుకల కోసం శుక్రవారం రాత్రి గోదావరిఖని, కవిత థియేటర్ సమీపంలోని శ్రీనగర్ కాలనీలో ఉన్న ఒక ప్రైవేట్ రెస్టారెంట్‌లో భోజనం (బిర్యానీ) చేశారు. హాస్టల్‌కు తిరిగి వచ్చిన కొద్దిసేపటికే విద్యార్థులకు వాంతులు, విరోచనాలు ప్రారంభమయ్యాయి.

ఆసుపత్రిలో చికిత్స

అస్వస్థతకు గురైన వారిని వెంటనే సిబ్బంది గోదావరిఖని ప్రభుత్వ ఏరియా ఆసుపత్రికి తరలించారు. ప్రస్తుతం విద్యార్థులందరి ఆరోగ్యం నిలకడగా ఉందని, ప్రాణాపాయం లేదని ఆసుపత్రి ఆర్ఎంఓ కృపాబాయి ధృవీకరించారు. విద్యార్థులకు మెరుగైన వైద్య సేవలు అందుతున్నాయని తెలిపారు. 

అధికారుల విచారణకు డిమాండ్

ఒకేసారి ఇంతమంది విద్యార్థులు అస్వస్థతకు గురికావడంతో ఆ రెస్టారెంట్‌లోని ఆహార నాణ్యత, పరిశుభ్రత ప్రమాణాలపై అనుమానాలు వ్యక్తమవుతున్నాయి. ఘటనపై సమగ్ర విచారణ జరిపి, బాధ్యులపై చర్యలు తీసుకోవాలని స్థానికులు కోరుతున్నారు. వర్షాకాలం కావడంతో బయట దొరికే ఆహారం విషయంలో ప్రజలు, ముఖ్యంగా యువత అప్రమత్తంగా ఉండాలని వైద్యులు సూచిస్తున్నారు.