1 July, 2026 | 7:57 PM 
జూన్ 2 నుంచి ‘ఇందిరమ్మ’ జీవిత బీమా
- ప్రతి కుటుంబానికి రూ.5 లక్షల ఇన్సూరెన్స్
1.15 లక్షల కుటుంబాలకు అమలు
హైదరాబాద్, మార్చి 20 (విజయక్రాంతి): రాష్ట్రంలోని ప్రతి కుటుంబానికీ భద్రత కల్పించేందుకు ఇందిరమ్మ కుటుంబ జీవిత బీమా పథకాన్ని అమలు చేయనున్నట్లు ప్రభుత్వం సంకల్పించింది. ఒక కుటుంబంలో ఆదాయం తెచ్చే వ్యక్తి దురదృష్టవశాత్తు అకస్మాత్తుగా మరణిస్తే ఆ కుటుంబానికి రూ.5 లక్షలు బీమా అందించనున్నారు. రాష్ట్రంలోని 1 కోటి 15 లక్షల కుంటుంబాలకు దీన్నీ వర్తింపచేయనున్నారు.
ఈ పథకానికి బడ్జెట్లో రూ.4 వేల కోట్లను కేటాయించారు. ఈ బీమా పథకాన్ని ఈ ఏడాది రాష్ట్ర అవతరణ దినోత్సవం సందర్భంగా జూన్ 02 నుంచి ప్రారంభించనున్నారు. కుటుంబ పెద్ద అకస్మాత్తుగా మరణిస్తే ఆ కుటుంబ ఆర్థిక కష్టాలు అన్నీఇన్నీ కావు. ఆ కుటుంబం పడే మానసిక వేదన ఒకటైతే, వాళ్లు ఎదుర్కొనే ఆర్థిక సమస్య మరోటి. ఈ ఒక్క సంఘటనతో ఆ కుటుంబం మొత్తం రోడ్డున పడే పరిస్థితి ఉంటుంది. ఇలాంటి వారి కోసం పేద, మధ్యతరగతి, ధనిక అని తేడా లేకుండా ఆయా కుటుంబాలను ఆదుకునేందుకు రూ.5 లక్షల బీమా పథకాన్ని అందించేలా రాష్ట్ర ప్రభుత్వం రూపొందించింది.
