ప్రభుత్వ జూనియర్ కళాశాలలో ఉచిత నోట్ పుస్తకాల పంపిణీ

యాదగిరిగుట్ట, ఆగస్టు 17 : యాదగిరిగుట్ట: యాదగిరిగుట్ట ప్రభుత్వ జూనియర్ కళాశాలలో  రాష్ట్ర ప్రభుత్వం ఉచితంగా సరఫరా చేసిన నోట్ పుస్తకాలను విద్యార్థిని, విద్యార్థులకు పంపిణీ చేశారు. సోమవారం  కళాశాల ప్రిన్సిపల్ పి. మంజుల, లైబ్రేరియన్ రజిత  ఆధ్వర్యంలో పంపిణీ   కార్యక్రమాన్ని నిర్వహించారు. ఈ సందర్భంగా ప్రిన్సిపల్ పి. మంజుల  మాట్లాడుతూ ప్రభుత్వం ఉచితంగా అందిస్తున్న నోట్ పుస్తకాలను విద్యార్థులు సద్వినియోగం చేసుకోవాలని సూచించారు.

ప్రతిరోజూ తరగతులకు క్రమం తప్పకుండా హాజరై, అధ్యాపకులు బోధించే అంశాలను శ్రద్ధగా విని, ముఖ్యమైన విషయాలను నోట్ పుస్తకాల్లో నమోదు చేసుకోవాలని తెలిపారు. విద్యార్థులకు  సందేహాలు వచ్చినప్పుడు అధ్యాపకులను అడిగి నివృత్తి చేసుకోవాలని సూచించారు.

పరీక్షలకు ముందుగానే ప్రణాళికాబద్ధంగా సిద్ధమై మంచి ఫలితాలు సాధించాలని ఆకాంక్షించారు. విద్యార్థులు మొబైల్ ఫోన్, సోషల్ మీడియా వినియోగాన్ని పరిమితం చేసి చదువుపై ఎక్కువ దృష్టి పెట్టాలని, కళాశాల గ్రంథాలయాన్ని సద్వినియోగం చేసుకోవాలని ప్రిన్సిపల్ అన్నారు. క్రమశిక్షణ, సమయపాలన, నిరంతర కృషి ద్వారా ఉన్నత లక్ష్యాలను సాధించాలని విద్యార్థులకు పిలుపునిచ్చారు. ఈ కార్యక్రమంలో కళాశాల అధ్యాపక బృందం, నాన్-టీచింగ్ సిబ్బంది, విద్యార్థిని, విద్యార్థులు పాల్గొన్నారు.