ఈ నెల 5న నకిరేకల్‌కు సీఎం రేవంత్‌రెడ్డి

మినీ స్టేడియంలో భారీ బహిరంగ సభ

ఏర్పాట్లను పరిశీలించిన ఎమ్మెల్యే, కలెక్టర్, ఎస్పీ

చిట్యాల,(విజయక్రాంతి): ముఖ్యమంత్రి రేవంత్‌రెడ్డి(CM Revanth Reddy) ఈ నెల 5న (శనివారం) నకిరేకల్‌లో(Nakirekal) పర్యటించనున్న నేపథ్యంలో మినీ స్టేడియంలో నిర్వహించనున్న భారీ బహిరంగ సభ ఏర్పాట్లను ప్రభుత్వ విప్, నకిరేకల్ ఎమ్మెల్యే వేముల వీరేశం, జిల్లా కలెక్టర్ చంద్రశేఖర్, ఎస్పీ శరత్ చంద్ర పవర్, వివిధ శాఖల అధికారులు మంగళవారం పరిశీలించారు. సభా ప్రాంగణం, వేదిక, పార్కింగ్, ప్రజలకు అవసరమైన సౌకర్యాలు తదితర ఏర్పాట్లపై అధికారులతో చర్చించారు.

ఈ సందర్భంగా ఎమ్మెల్యే వేముల వీరేశం(MLA Vemula Veeresham) మాట్లాడుతూ... ప్రజా ప్రభుత్వం 1000 రోజుల పాలనను పూర్తి చేసుకుందని, గత విధ్వంసక పాలన నుంచి తెలంగాణ వికాసం వైపు ముందుకు సాగుతోందని అన్నారు. ముఖ్యమంత్రి పర్యటనలో భాగంగా నకిరేకల్‌లో 100 పడకల ఆసుపత్రి ప్రారంభోత్సవంతో పాటు పలు అభివృద్ధి పనులకు శంకుస్థాపనలు జరగనున్నట్లు తెలిపారు. గత బీఆర్ఎస్ ప్రభుత్వ హయాంలో రాష్ట్రంపై రూ.8 లక్షల కోట్ల అప్పుల భారం మోపారని ఎమ్మెల్యే విమర్శించారు.

డబుల్ బెడ్రూం ఇళ్లు, ఇంటికో ఉద్యోగం, ప్రతి కుటుంబానికి మూడెకరాల భూమి వంటి హామీలను గత ప్రభుత్వం అమలు చేయలేదని ఆరోపించారు. ప్రజా ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లేందుకు సీఎం పర్యటన కీలకమని పేర్కొన్నారు. ముఖ్యమంత్రి రేవంత్‌రెడ్డి పాల్గొనే సభకు నకిరేకల్ నియోజకవర్గంలోని ప్రజలు, కాంగ్రెస్ పార్టీ నాయకులు, కార్యకర్తలు భారీ సంఖ్యలో తరలివచ్చి సభను విజయవంతం చేయాలని ఎమ్మెల్యే వేముల వీరేశం పిలుపునిచ్చారు.