రేపు వరంగల్, హుస్నాబాద్ లో సీఎం ఏరియల్ సర్వే

1. ప్రతి కూల వాతావరణం వల్ల ఇవాళ పర్యటన వాయిదా
2. తుపాన్ ప్రభావిత జిల్లా ఇన్ ఛార్జ్ మంత్రులకు ఆదేశాలు

హైదరాబాద్: వరద ప్రభావిత ప్రాంతాల్లో ముఖ్యమంత్రి రేవంత్ రెడ్డి(CM Revanth Reddy) ఏరియల్ సర్వే చేయాలని నిర్ణయించారు. శుక్రవారం నాడు వరంగల్, హుస్నాబాద్ ప్రాంతాల్లో రేవంత్ ఏరియల్ సర్వే నిర్వహించనున్నారు. ప్రతికూల వాతావరణం వల్ల ఇవాళ వరంగల్ పర్యటనను సీఎం వాయిదా వేసుకున్నారు. తుపాను ప్రభావిత జిల్లాల ఇన్ ఛార్జ్ మంత్రులు క్షేత్రస్థాయిలో పర్యటిస్తూ ప్రజలకు అందుబాటులో ఉండాలని ఆదేశించారు. కష్టాల్లో ఉన్న ప్రజలకు ఆదుకునే ప్రయత్నం చేయాలన్నారు. ప్రజలను ఆదుకునేందుకు ప్రభుత్వం సిద్ధంగా ఉందని సూచించారు. వరద సహాయక చర్యలను అన్ని ప్రణాళికలను సిద్ధం చేస్తున్నామని సీఎం వివరించారు. 

తుఫాను ప్రభావిత ప్రాంతాల్లో పరిస్థితిని సమీక్షించడానికి ముఖ్యమంత్రి రేవంత్ రెడ్డి గురువారం అధికారులతో వీడియో కాన్ఫరెన్స్ నిర్వహించారు. ప్రతికూల వాతావరణ పరిస్థితులు ఉన్నప్పటికీ వరి సేకరణ సజావుగా జరిగేలా కీలక ఆదేశాలు జారీ చేశారు. కొనుగోలు కేంద్రాలలో క్షేత్రస్థాయి చర్యలకు సంబంధించి జిల్లా కలెక్టర్లకు అవసరమైన మార్గదర్శకాలను నిరంతరం జారీ చేయాలని ఆయన పౌర సరఫరాల శాఖను ఆదేశించారు. వరి సేకరణకు అత్యధిక ప్రాధాన్యత ఇవ్వాలన్నారు. కార్యకలాపాలను పర్యవేక్షించడానికి ప్రతి కొనుగోలు కేంద్రానికి ఒక మండల స్థాయి అధికారిని ప్రత్యేక అధికారిగా నియమించాలని ఆదేశించారు.

వర్షాల కారణంగా నిల్వ చేయడం కష్టంగా ఉన్న ప్రాంతాల్లో, కొనుగోలు చేసిన ధాన్యం చెడిపోకుండా సమీపంలోని ఫంక్షన్ హాళ్లకు మార్చాలని ముఖ్యమంత్రి సూచించారు. ప్రతి కొనుగోలు కేంద్రం నుండి కలెక్టర్లు ప్రతిరోజూ 24 గంటల స్థితి నివేదికలను స్వీకరించాలని, నివేదికలు సమర్పించడంలో విఫలమైన లేదా విధులను నిర్లక్ష్యం చేసిన అధికారులు తక్షణ చర్యలు తీసుకుంటారని హెచ్చరించారు. సాధారణ పరిస్థితులు నెలకొనే వరకు అధికారులందరూ రంగంలోనే ఉండాలని రేవంత్ రెడ్డి స్పష్టం చేశారు. ముఖ్యంగా దెబ్బతిన్న రోడ్లపై సహాయ, ట్రాఫిక్ నిర్వహణను పర్యవేక్షించడానికి ఉమ్మడి పర్యవేక్షణ కేంద్రాలను ఏర్పాటు చేయాలని జిల్లా కలెక్టర్లు, ఎస్పీలను ఆదేశించారు.