తగ్గేదేలే అంటున్న ట్రంప్

వాషింగ్టన్: అమెరికా అధ్యక్షుడు డొనాల్డ్ ట్రంప్(US President Donald Trump) సుంకాల విషయంలో వెనక్కి తగ్గేదేలే అంటున్నారు. ప్రపంచదేశాలపై 10 శాతం టారిఫ్ విధిస్తూ ట్రూత్ లో ట్రంప్ పోస్టు చేశారు. ట్రంప్ విధించిన సుంకాలు చెల్లవని అమెరికా సుప్రీం కోర్టు నిన్న తీర్పు వెల్లడించింది. సుప్రీంకోర్టు తీర్పు తర్వాత 10 శాతం గ్లోబల్ టారిఫ్ తక్షణమే అమలులోకి వస్తుందని ఆర్డర్స్ పై డొనాల్డ్ ట్రంప్ సంతకం చేశారు. సుంకాలు, ప్రతీకార సుంకాలపై సుప్రీంకోర్టు నిర్ణయం అమెరికాకు అవమానకరమని ట్రంప్ తెలిపారు.

సుంకాలపై జడ్జీలు ఇచ్చిన తీర్పును చూసి తాను సిగ్గుపడుతున్నట్లు పేర్కొన్నారు. వివిధ దేశాలపై టారిఫ్ విధింపులో వెనక్కి తగ్గేదే లేదని ఆయన తెల్చిచెప్పారు. భారత్ తో కుదిరిన ఒప్పందానికి వచ్చే ముప్పేమీ లేదని తెలిపారు. ట్రంప్ సుంకాలను ఆరుగురు జడ్జిలు వ్యతిరేకించారు. అందులో నలుగురు మహిళలు, ఇద్దరు పురుషులున్నారు. ట్రంప్ సుంకాలను అమీకోనీ బారెట్, సోనియా సోటోమేయర్, ఎలెనా కగన్, కేతాంజీ బ్రౌన్ జాక్సన్, జాన్ రాబర్ట్స్, నీల్ గోర్సుచ్ వ్యతిరేకించగా, ముగ్గురు జడ్జిలు క్లారెన్స్ థామస్, బ్రెట్ కవనాఫ్, శామ్యూల్ అలిటో ట్రంప్ సుంకాలను సమర్థించారు.