“మా కాలనీ మీదుగా లైన్ వద్దు” — సింగరేణి తీరుపై ప్రజలు ఆగ్రహం

సత్తుపల్లి,(విజయక్రాంతి): కిష్టారం గ్రామంలోని బీసీ కాలనీ మీదుగా 33 కెవి విద్యుత్ లైన్‌ను తీసుకెళ్లడంపై స్థానిక ప్రజలు తీవ్ర అభ్యంతరం వ్యక్తం చేస్తున్నారు. గ్రామ ప్రజలకు ముందస్తు సమాచారం ఇవ్వకుండా, వారి అభిప్రాయాలను పట్టించుకోకుండా సింగరేణి అధికారులు ఏకపక్షంగా నిర్ణయం తీసుకున్నారని ఆరోపిస్తున్నారు. స్థానికుల ప్రకారం, ఈ లైన్ బీసీ కాలనీ మధ్యగా వెళితే భవిష్యత్తులో భద్రతా సమస్యలు తలెత్తే అవకాశముందని వారు ఆందోళన వ్యక్తం చేస్తున్నారు. చిన్నపిల్లలు, వృద్ధులు నివసించే ప్రాంతంలో హైటెన్షన్ లైన్ ఏర్పాటు ప్రమాదకరమని పేర్కొన్నారు.

“మా కాలనీ మీదుగా లైన్ వద్దు” అంటూ బీసీ కాలనీ ప్రజలు సింగరేణి అధికారులను హెచ్చరించారు. గ్రామస్థులకు ముందుగా సమాచారం ఇవ్వకపోవడం, ప్రజల అభిప్రాయాలను పరిగణలోకి తీసుకోకపోవడం తగదని మండిపడ్డారు. ఇక, సింగరేణి అధికారులు మాత్రం ప్రాజెక్ట్ అవసరాల దృష్ట్యా ఈ లైన్ ఏర్పాటు చేస్తున్నామని, అన్ని నిబంధనలు పాటిస్తున్నామని చెబుతున్నారు. అయితే ప్రజల ఆందోళనలను దృష్టిలో ఉంచుకుని ప్రత్యామ్నాయ మార్గాలను పరిశీలించాలని స్థానికులు డిమాండ్ చేస్తున్నారు. ఈ విషయంపై సంబంధిత అధికారులు త్వరగా స్పందించి సమస్యను పరిష్కరించాలని గ్రామ ప్రజలు కోరుతున్నారు.