తెలంగాణ జలసిరిపై ప్రజలకు అవగాహన కల్పించిన పెద్దకాపర్తి సర్పంచ్

చిట్యాల,(విజయ క్రాంతి): చిట్యాల మండలం పెద్దకాపర్తి గ్రామంలో నిర్వహించిన గ్రామసభలో తెలంగాణ జలసిరి కార్యక్రమంపై గ్రామ సర్పంచ్ కాటం వెంకటేశం ప్రజలకు అవగాహన కల్పించారు. ఈ సందర్భంగా ఆయన మాట్లాడుతూ, తెలంగాణ జలసిరి పథకం కింద వీబీజీ రాంజీ ద్వారా ఉపాధి కల్పిస్తూ గ్రామసభ ఆమోదంతో పనులను గుర్తించి రైతులు వాటిని చేపట్టవచ్చని తెలిపారు. భూగర్భ జలాలను పెంపొందించేందుకు ఇంకుడు గుంతలు, పంట గుంటలు, బోర్ గుంటల నిర్మాణం వంటి నీటి సంరక్షణ పనులు విస్తృతంగా చేపట్టాలని సూచించారు.

నీటి మట్టం తగ్గిన బోర్ల చుట్టూ కందకం తవ్వి, అడుగుభాగంలో పెద్ద రాళ్లు, వాటిపై చిన్న రాళ్లు, అనంతరం ఇసుక పొర వేసి వర్షపు నీరు భూమిలోకి ఇంకేలా చేస్తే ఎండిపోయిన బోర్లలో కూడా నీరు వచ్చే అవకాశం ఉంటుందని వివరించారు. అలాగే పాఠశాలలు, ఆసుపత్రులు, అంగన్‌వాడీ కేంద్రాలు తదితర భవనాల పైకప్పుల నుంచి వచ్చే వర్షపు నీటిని ఇంకుడు గుంతలకు మళ్లించడం ద్వారా భూగర్భ జలాలు గణనీయంగా పెరుగుతాయని తెలిపారు. ప్రతి ఇంటిలో ఒక ఇంకుడు గుంత ఏర్పాటు చేసుకునేలా గ్రామ పంచాయతీ పాలకవర్గం, ఫీల్డ్ అసిస్టెంట్లు పూర్తిస్థాయిలో సహకరిస్తారని హామీ ఇచ్చారు.