అన్న-అక్క మెంటార్‌షిప్ శిబిరం

నిర్మల్,(విజయక్రాంతి): నిర్మల్ ప్రభుత్వ డిగ్రీ కళాశాలలో విద్యార్థులకు ఆధునిక సాంకేతికతపై అవగాహన కల్పించేందుకు చేపట్టిన రెండు రోజుల ‘అన్న-అక్క మెంటార్‌షిప్’ శిక్షణ కార్యక్రమం శుక్రవారం ఘనంగా ముగిసింది. ఈ కార్యక్రమానికి ప్రిన్సిపల్ సుధాకర్ మాట్లాడుతూ... మారుతున్న కాలానికి అనుగుణంగా విద్యార్థులు సాంకేతిక పరిజ్ఞానాన్ని అందిపుచ్చుకోవాల్సిన అవసరం ఎంతైనా ఉందని అన్నారు. ప్రస్తుత విద్యా విధానంలో కృత్రిమ మేధస్సు (AI) కీలక పాత్ర పోషిస్తోందని, ఈ నైపుణ్యాలను అలవర్చుకోవడం ద్వారా ప్రపంచ స్థాయి ఉపాధి అవకాశాలను సులభంగా దక్కించుకోవచ్చని ఆయన స్పష్టం చేశారు.

​సామాజిక బాధ్యతగా అవగాహన కల్పన

కళాశాల నోడల్ అధికారులు శ్రీ కె. రమేష్ రెడ్డి, శ్రీమతి జి. అర్చన మరియు శ్రీ హసీబుర్ రెహమాన్ మాట్లాడుతూ.. ఐదవ సెమిస్టర్ విద్యార్థులకు ఈ ఇంటర్న్‌షిప్ తప్పనిసరి అని పేర్కొన్నారు. శిక్షణ పొందిన విద్యార్థులు తమ సామాజిక బాధ్యతగా రాబోయే 15 రోజుల పాటు, రోజుకు రెండు గంటల చొప్పున పరిసర ప్రాంతాల్లోని ప్రభుత్వ పాఠశాల విద్యార్థులకు ఏఐ మరియు డిజిటల్ లెర్నింగ్ అంశాలపై అవగాహన కల్పిస్తారని తెలిపారు. విద్యార్థులు నేర్చుకున్న జ్ఞానాన్ని సమాజానికి అందించడం ఈ కార్యక్రమం యొక్క ప్రధాన ఉద్దేశమని వారు వివరించారు.

​ఈ ముగింపు కార్యక్రమంలో కళాశాల వైస్ ప్రిన్సిపల్ డాక్టర్ యు. గంగాధర్, అధ్యాపకులు డాక్టర్ పి. జి. రెడ్డి, డాక్టర్ సూర్య సాగర్, హేమలత, సుభాష్, శ్రీహరి తదితరులు పాల్గొన్నారు. పెద్ద సంఖ్యలో విద్యార్థులు హాజరై, ఈ శిక్షణ ద్వారా ఎంతో నేర్చుకున్నామని ఉత్సాహం వ్యక్తం చేశారు.