కార్మికుల ఐక్యత వర్థిల్లాలి

ఎమ్మెల్సీ తీన్మార్ మల్లన్న 

హైదరాబాద్, మే 1 (విజయక్రాంతి): ఉప్పల్‌లోని ఎన్‌ఆర్బీ బేరింగ్స్ కంపెనీలో కార్మిక దినోత్సవం సందర్భంగా తెలంగాణ రాజ్యాధికార కార్మిక విభాగం ఆధ్వర్యంలో శుక్రవారం పార్టీ అధ్యక్షుడు, ఎమ్మెల్సీ తీన్మార్ మల్లన్న జెండాను ఎగురవేశారు. ఈ సందర్భంగా మల్లన్న కార్మికులను ఉద్దేశించి మాట్లాడుతూ.. నేటి పరిస్థితుల్లో కార్మికులు ఎదుర్కొంటున్న సమస్యలు, కష్టాలను వివరించారు. కష్టజీవుల శ్రమతోనే సమాజం ముందుకు సాగుతోందని, కానీ వారికి సరైన గౌరవం, భద్రత లభించడం లేదని ఆవేదన వ్యక్తం చేశారు.

ప్రతి కార్మికుడికి తెలంగాణ రాజ్యాధికార పార్టీ ఎల్లప్పుడూ అండగా ఉంటుందని భరోసా ఇచ్చిన ఆయన, టీఆర్‌కేవీలో సభ్యత్వం పొందిన ప్రతి కార్మికుడికి 10 లక్షల రూపాయల ప్రమాద బీమా అందజేస్తామని స్పష్టం చేశారు. ఈ కార్యక్రమంలో తెలంగాణ రాజ్యాధికార కార్మిక విభాగం రాష్ట్ర అధ్యక్షులు సంకూరి శ్రీనివాస్, పార్టీ క్రమశిక్షణ కమిటీ చైర్మన్ బంధారపు నర్సయ్య గౌడ్, రాష్ట్ర నాయకులు సుతారపు రంగన్న తదితరులు పాల్గొన్నారు.