42 ఏళ్ల కాంగ్రెస్ బంధానికి జీవన్ రెడ్డి గుడ్ బై

కాంగ్రెస్ పార్టీకి జీవన్ రెడ్డి  రాజీనామా 

నాకు పోరాటం కొత్త కాదు.. రేవంత్ రెడ్డిపైనా పోరాటం చేస్తా

హైదరాబాద్: జగిత్యాలలో కార్యకర్తల సమక్షంలో మాజీ మంత్రి, కాంగ్రెస్ సీనియర్ నాయకుడు జీవన్ రెడ్డి(Jeevan Reddy) పార్టీకి రాజీనామా చేశారు. తన రాజీనామా లేఖను ఏఐసీసీ అధ్యక్షుడు మల్లికార్జున ఖర్గేకు పంపించారు. 42 ఏళ్ల కాంగ్రెస్(Congress Party) బంధానికి జీవన్ రెడ్డి గుడ్ బై చెప్పారు. ఈ సందర్భంగా జీవన్ రెడ్డి మాట్లాడుతూ సంచలన వ్యాఖ్యలు చేశారు. తనకు అండగా ప్రభుత్వం లేదు.. పార్టీ లేదన్నారు. మహేశ్ కుమార్ గౌడ్ ఇచ్చిన హామీ ఏమైంది? అని జీవన్ రెడ్డి ప్రశ్నించారు. తనకు పోరాటం కొత్త కాదన్న జీవన్ రెడ్డి చంద్రబాబు, కేసీఆర్ తో పోరాడానని గుర్తుచేశారు. ఇప్పుడు సీఎం రేవంత్ రెడ్డితో పోరాటానికి కూడా సిద్ధమేనని సవాల్ చేశారు.

కాంగ్రెస్ పార్టీ తనదని సీఎం రేవంత్ రెడ్డి అనుకుంటున్నారు. రెండేళ్లు అవమానంతోనే గడిచింది.. ఆత్మగౌరవ పోరాటం చేద్దామని కార్యకర్తలకు పిలుపునిచ్చారు. అందరం కలిసి పనిచేద్దామని బుజ్జగించే ప్రయత్నం చేశారని తెలిపారు. ఓపిక పట్టాలని కోరారు.. ఇంకా ఎంతకాలం ఓపిక పట్టాలని ఆగ్రహం వ్యక్తం చేశారు. తనకు పార్టీ మారాలనే ఆలోచన లేదన్న జీవన్ రెడ్డి తనను ఏ గుర్తింపు లేకుండా అణగదొక్కాలని చూస్తున్నారని ఆరోపించారు. జగిత్యాలలో తన ఉనికి ఉండకూడదని కుట్ర చేస్తున్నారని మండిపడ్డారు.