తెలంగాణలో ఓ వైపు భారీ వర్షాలు.. మరోవైపు ఎండలు

తెలంగాణలో భిన్న వాతావరణ పరిస్థితులు

హైదరాబాద్: తెలంగాణ రాష్ట్రంలో భిన్న వాతావరణ పరిస్థితులు కనబడుతున్నాయి. ఉత్తర తెలంగాణలో ఎండలు, వడగాలులు ఇంకా మండుతున్నాయి. దక్షిణ తెలంగాణ జిల్లాల్లో మోస్తరు నుంచి భారీ వర్షాలు కురుస్తున్నాయి. పలు జిల్లాలకు వాతావరణ శాఖ హెల్లో హెచ్చరికలు జారీ చేసింది. హైదరాబాద్‌లో శుక్రవారం మోస్తరు నుండి భారీ వర్షం కురిసే అవకాశం ఉందని, నగరంలోని దక్షిణ ప్రాంతాల్లో అత్యధిక వర్షపాతం నమోదయ్యే సూచనలు ఉన్నాయని అధికారులు పేర్కొన్నారు. నగరంలోని ఇతర ప్రాంతాల్లో అక్కడక్కడా జల్లులు పడే అవకాశం ఉండగా, సాయంత్రం వరకు వాతావరణం ప్రధానంగా పొడిగా ఉండే అవకాశం ఉందని వాతావరణ శాఖ అధికారులు ప్రకటించారు.

జిల్లాలకు భారీ వర్ష సూచన 

తెలంగాణలోని యాదాద్రి భువనగిరి, నాగర్‌కర్నూల్, రంగారెడ్డి, నల్గొండ, మహబూబ్‌నగర్, వనపర్తి, భద్రాద్రి కొత్తగూడెం, ఖమ్మం, మహబూబాబాద్, ములుగు, జయశంకర్ భూపాలపల్లి, ఆదిలాబాద్, హనుమకొండ,  వరంగల్, కుమురం భీమ్ ఆసిఫాబాద్ సహా పలు జిల్లాల్లో భారీ వర్షాల హెచ్చరిక జారీ చేయబడింది. కొన్ని చోట్ల 100 మి.మీ వరకు వర్షం కురిసే అవకాశం ఉంది. ఉరుములు, మెరుపులతో కూడిన భారీ నుండి అతి భారీ వర్షపాతం రాష్ట్రంలోని కొన్ని ప్రాంతాలపై ప్రభావం చూపుతున్నందున ఈ సూచన వచ్చింది. తెలంగాణ డెవలప్‌మెంట్ ప్లానింగ్ సొసైటీ (టీజీడీపీఎస్) గణాంకాల ప్రకారం నల్గొండ, నాగర్‌కర్నూల్, సూర్యాపేట, ఖమ్మం, యాదాద్రి భువనగిరి, నిజామాబాద్, నిర్మల్, జగిత్యాల జిల్లాల్లో గణనీయమైన వర్షపాతం నమోదైంది.