ఇంఫాల్: మణిపూర్‌లోని తెంగ్నౌపాల్ జిల్లాలో భారత్-మయన్మార్ సరిహద్దు సమీపంలో నలుగురు మిలిటెంట్లను అరెస్టు చేసినట్లు పోలీసులు శనివారం తెలిపారు. మోరే పోలీస్ స్టేషన్ పరిధిలోని యాంగౌబుంగ్ గ్రామం నుండి ఈ అరెస్టులు జరిగాయని పేర్కొన్నారు. అరెస్టయిన వారిని పీపుల్స్ లిబరేషన్ ఆర్మీకి చెందిన కైషమ్ సుమంత మైతేయి (25), ఎన్‌ఆర్‌ఎఫ్‌ఎమ్‌కి చెందిన అంగోమ్ సోమోర్జిత్ సింగ్ (32), కంగ్లీపాక్ కమ్యూనిస్ట్ పార్టీ (ఎంఎఫ్‌ఎల్)కు చెందిన యుమ్నమ్ నవోబా సింగ్ (26), ఖుండ్రక్‌పం శ్యాంసన్ మెయిటీ (25)గా గుర్తించారు.

అధికారుల ప్రకారం, మిలిటెంట్లు అపహరణ కార్యకలాపాలతో పాటు వ్యాపారులు, కాంట్రాక్టర్లు, ప్రభుత్వ ఉద్యోగులు, సామాన్య పౌరులతో సహా సమాజంలోని వివిధ వర్గాల నుండి బలవంతంగా డబ్బు వసూలు చేయడంలో నిమగ్నమై ఉన్నారు. కేంద్ర, రాష్ట్ర ఏజెన్సీలతో కూడిన భద్రతా దళాలు, పలు జిల్లాల్లోని మారుమూల, మిశ్రమ జనాభా గల, సున్నితమైన ప్రాంతాలలో కొనసాగుతున్న గాలింపు చర్యలు, ప్రాంత ఆధిపత్య డ్రైవ్‌లతో ఉగ్రవాద గ్రూపులపై ఉక్కు చర్యలను ముమ్మరం చేశాయి. అసాంఘిక, అనుమానాస్పద శక్తుల సంచారాన్ని కట్టడి చేసేందుకు, మణిపూర్‌లోని లోయ, కొండ జిల్లాల్లో కలిపి మొత్తం 117 తనిఖీ కేంద్రాలను ఏర్పాటు చేసినట్లు అధికారులు పేర్కొన్నారు.