ఆధారాలతోనే 22ఏ భూములపై నిర్ణయాలు తీసుకోవాలి

నిజమైన ప్రైవేట్ భూముల సమస్యలను 48 గంటల్లో పరిష్కరించాలి

అధికారులతో సమీక్ష సమావేశంలో జిల్లా కలెక్టర్ కోయ శ్రీహర్ష

పెద్దపల్లి, ఆగస్టు 31 (విజయ క్రాంతి): 22ఏ నిషేధిత భూములకు సంబంధించిన వ్యవహారాల్లో పూర్తి ఆధారాలు, రికార్డులను క్షుణ్ణంగా పరిశీలించిన అనంతరం మాత్రమే నిర్ణయాలు తీసుకోవాలని జిల్లా కలెక్టర్ కోయ శ్రీహర్ష అధికారులను ఆదేశించారు. ప్రభుత్వ భూముల పరిరక్షణ విషయంలో ఎట్టి పరిస్థితుల్లోనూ రాజీపడొద్దని స్పష్టం చేశారు.

సోమవారం పెద్దపల్లి సమీకృత జిల్లా కార్యాలయ సముదాయంలో అదనపు కలెక్టర్ బి. శ్రీరాములుతో కలిసి 22ఏ నిషేధిత భూముల జాబితాపై రెవెన్యూ అధికారులతో జిల్లా కలెక్టర్ కోయ శ్రీహర్ష సమీక్ష సమావేశం నిర్వహించారు. ఈ సందర్భంగా 22ఏ భూములకు సంబంధించి రిజిస్ట్రేషన్ కార్యాలయాలకు వస్తున్న ఫిర్యాదులు, భూముల రికార్డుల పరిశీలన, జాబితాలో చేర్పు, తొలగింపు ప్రక్రియ తదితర అంశాలపై అధికారులతో విస్తృతంగా సమీక్షించారు.

ప్రతి భూమికి స్పష్టమైన ఆధారాలు ఉండాలి

22ఏ నిషేధిత జాబితాలో చేర్చే ప్రతి భూమికి స్పష్టమైన ఆధారాలు, సంబంధిత రికార్డులు ఉండాలని కలెక్టర్ సూచించారు. ఏదైనా ప్రైవేట్ భూమి పొరపాటున 22ఏ నిషేధిత జాబితాలో నమోదైనట్లు నిర్ధారణ అయితే, సర్వే నంబర్ వారీగా తొలగింపు జాబితాను రూపొందించి ఆన్‌లైన్‌లో నమోదు చేయాలని ఆదేశించారు. భూములను 22ఏ జాబితాలో చేర్చే సమయంలో అనుసరించే విధానాన్నే తొలగింపు ప్రక్రియలోనూ పాటించాలని తెలిపారు. జాబితా నుంచి తొలగించే ప్రతి సర్వే నంబర్‌కు నిర్దిష్ట కారణాలు, స్పష్టమైన రిమార్కులు తప్పనిసరిగా నమోదు చేయాలని సూచించారు.

48 గంటల్లో సమస్యల పరిష్కారానికి చర్యలు

నిజమైన ప్రైవేట్ భూములు పొరపాటున 22ఏ జాబితాలో నమోదై ప్రజలు ఇబ్బందులు ఎదుర్కొంటున్నట్లయితే, వారి సమస్యలను ప్రాధాన్యతగా తీసుకుని 48 గంటల్లో పరిష్కరించేందుకు చర్యలు చేపట్టాలని కలెక్టర్ కోయ శ్రీహర్ష అధికారులను ఆదేశించారు. ప్రజలకు ఎలాంటి ఇబ్బందులు కలగకుండా 22ఏ సమస్యలను పారదర్శకంగా, వేగవంతంగా పరిష్కరించాలని సూచించారు. 22ఏ భూములకు సంబంధించిన ఫిర్యాదులపై రెవెన్యూ అధికారులు పరస్పర సమన్వయంతో పనిచేయాలని, రికార్డులను క్షుణ్ణంగా పరిశీలించిన తర్వాతే తుది నిర్ణయాలు తీసుకోవాలని స్పష్టం చేశారు.

జిల్లావ్యాప్తంగా ఒకే విధానం

22ఏ నిషేధిత భూముల పరిశీలన, జాబితాలో చేర్పు, తొలగింపు ప్రక్రియలో జిల్లావ్యాప్తంగా ఒకే విధానాన్ని అనుసరించేలా ప్రత్యేక ఫార్మాట్ రూపొందించాలని కలెక్టర్ అధికారులను ఆదేశించారు. ప్రభుత్వ భూముల పరిరక్షణలో ఎలాంటి నిర్లక్ష్యానికి తావులేకుండా అప్రమత్తంగా వ్యవహరించాలని సూచించారు. ఈ సమావేశంలో ఆర్డీఓ గంగయ్య, తహసీల్దార్లు, రెవెన్యూ సిబ్బంది, సంబంధిత అధికారులు తదితరులు పాల్గొన్నారు.