మణుగూరు సింగరేణి ఆసుపత్రిలో కలకలం

- గేట్‌పాస్ కోసం అంబులెన్స్ ఆలస్యం

-  సొంత వాహనంలో గర్భిణీ తరలింపు!

మణుగూరు,(విజయక్రాంతి): మణుగూరు సింగరేణి ఏరియా ఆసుపత్రిలో చోటుచేసుకున్న ఓ ఘటన స్థానికంగా తీవ్ర చర్చకు దారితీసింది. ప్రసవ వేదనతో బాధపడుతున్న గర్భిణీని అత్యవసర వైద్యం కోసం తరలించేందుకు అంబులెన్స్ అవసరం కాగా, గేట్‌పాస్ నిబంధనల కారణంగా వాహనం బయటకు వెళ్లడంలో ఆలస్యం జరిగినట్లు కుటుంబ సభ్యులు ఆరోపిస్తున్నారు. గర్భిణీ పరిస్థితిని గమనించిన కుటుంబ సభ్యులు వెంటనే ఆసుపత్రి అంబులెన్స్‌ను పంపించాలని కోరినప్పటికీ, ఆసుపత్రి నుంచి అంబులెన్స్ బయటకు వెళ్లేందుకు గేట్‌పాస్ అవసరమని సిబ్బంది పేర్కొన్నట్లు తెలుస్తోంది.

అత్యవసర పరిస్థితిలో కూడా ప్రక్రియ పూర్తయ్యే వరకు వేచి ఉండాల్సిన పరిస్థితి ఏర్పడటంతో కుటుంబ సభ్యులు తీవ్ర ఆందోళనకు గురయ్యారు. అంబులెన్స్ కోసం ఎదురుచూసే పరిస్థితి లేకపోవడంతో చివరకు కుటుంబ సభ్యులే తమ సొంత వాహనంలో గర్భిణీని తరలించాల్సి వచ్చిందని చెబుతున్నారు. అత్యవసర వైద్య సేవల సమయంలో వాహనం అందుబాటులో లేకపోవడం, అందుబాటులో ఉన్న అంబులెన్స్‌ను పంపించడంలో ఆలస్యం జరగడం పట్ల స్థానికులు ఆగ్రహం వ్యక్తం చేస్తున్నారు.

ఈ విషయమై వాహన ఇన్‌చార్జ్‌ను వివరణ కోరగా, ఉన్నతాధికారుల ఆదేశాల మేరకే నిబంధనలను అమలు చేస్తున్నామని సమాధానం ఇచ్చినట్లు కుటుంబ సభ్యులు తెలిపారు. ప్రాణం కంటే నిబంధనలు ముఖ్యమా? అంటూ స్థానికులు ప్రశ్నిస్తున్నారు. అత్యవసర వైద్య పరిస్థితుల్లో గేట్‌పాస్ వంటి పరిపాలనా ప్రక్రియల కారణంగా అంబులెన్స్ సేవలు ఆలస్యం కాకుండా ప్రత్యేక విధానం రూపొందించాలని డిమాండ్ చేస్తున్నారు. ముఖ్యంగా ప్రసవ వేదనలో ఉన్న గర్భిణీలు, ప్రమాద బాధితులు, ప్రాణాపాయ స్థితిలో ఉన్న రోగుల విషయంలో అంబులెన్స్‌ను తక్షణమే అందుబాటులోకి తీసుకువచ్చేలా చర్యలు చేపట్టాలని కోరుతున్నారు. 

ఈ ఘటనపై సింగరేణి యాజమాన్యం సమగ్రంగా విచారణ జరిపి, వాస్తవ పరిస్థితులను వెలుగులోకి తీసుకురావడంతో పాటు భవిష్యత్తులో ఇలాంటి ఘటనలు పునరావృతం కాకుండా అత్యవసర సేవలపై స్పష్టమైన మార్గదర్శకాలు జారీ చేయాలని స్థానికులు కోరుతున్నారు. అత్యవసర సమయంలో నిబంధనలు పాటించాల్సిందే అయినప్పటికీ.. రోగి ప్రాణాలకు ముప్పు కలగకుండా నిబంధనలను అమలు చేసే విధానమే కీలకమని పలువురు అభిప్రాయపడుతున్నారు.