ట్యాంకర్‌ను ఢీకొట్టిన ఇంటర్‌సిటీ బస్సు.. 40 మంది ప్రయాణికులు సేఫ్

కట్టంగూర్: నల్గొండ జిల్లా కట్టంగూర్ మండలం(Kattangur Mandal) ముత్యాలమ్మగూడెం వద్ద మంగళవారం ఉదయం ప్రైవేట్ ట్రావెల్స్ ఇంటర్‌సిటీ బస్సు, సిమెంట్ మిక్సర్ ట్యాంకర్‌ను(Cement mixer tanker) ఢీకొనడంతో ఇద్దరు వ్యక్తులు గాయపడగా, దాదాపు 40 మంది ప్రయాణికులు తృటిలో భారీ ప్రమాదం నుండి బయటపడ్డారు. విజయవాడ నుంచి హైదరాబాద్‌కు వెళ్తున్న ఒక ప్రైవేట్ బస్సు టైర్ పేలడంతో డ్రైవర్ వాహనంపై నియంత్రణ కోల్పోయారు.

వాహనాన్ని అదుపులోకి తెచ్చేందుకు ప్రయత్నించినప్పటికీ, ఆ బస్సు రోడ్డు మధ్యలో ఉండే డివైడర్‌ను దాటి, ఎదురుగా వస్తున్న సిమెంట్ మిక్సర్ ట్యాంకర్‌ను ఢీకొట్టింది. ఈ ప్రమాదంలో బస్సు డ్రైవర్, ట్యాంకర్ డ్రైవర్ గాయపడి, తమ వాహనాల క్యాబిన్లలోనే చిక్కుకుపోయారు. స్థానికులు వెంటనే ఘటనా స్థలానికి చేరుకుని వారిని రక్షించారు. ఆ తర్వాత వారిని చికిత్స కోసం ఆసుపత్రికి తరలించారు. మిగిలిన ప్రయాణికులు ఎటువంటి గాయాలు లేకుండా బయటపడ్డారని అధికారులు తెలిపారు. ఈ ప్రమాదం జరగడంతో భారీగా ట్రాఫిక్ జామ్ అయింది. ఈ ఘటనపై కేసు నమోదు చేసుకున్న పోలీసులు కేసు నమోదు చేసుకుని క్రేన్ సాయంతో వాహనాలను తొలగించి ట్రాఫిక్ క్లియర్ చేశారు.