శిక్షణలో నేర్చుకున్న విషయాలను పాఠశాలల్లో అమలు చేయాలి

గణపురం,(విజయక్రాంతి): శిక్షణలో నేర్చుకున్న విషయాలను పాఠశాలల్లో అమలు చేయాలని జిల్లా విద్యా పరిశీలనాధికారి పింగళి విజయపాల్ రెడ్డి అన్నారు. గణపురం మండలంలోని తెలంగాణ రాష్ట్ర మోడల్ పాఠశాలలో జీవశాస్త్ర ఉపాధ్యాయులకు మూడు రోజులపాటు నిర్వహించిన శిక్షణ కార్యక్రమం ముగిసింది. ఈ కార్యక్రమానికి జిల్లా విద్యా పరిశీలనాధికారి పింగళి విజయపాల్ రెడ్డి హాజరై ఉపాధ్యాయులను ఉద్దేశించి మాట్లాడారు.

శిక్షణలో నేర్చుకున్న విషయాలను పాఠశాలల్లో అమలు చేయాలని, విద్యార్థుల ఆరోగ్యం, పరిశుభ్రత, పర్యావరణ పరిరక్షణపై శ్రద్ధ చూపాలని సూచించారు. అలాగే అభ్యాస పుస్తకాలను సక్రమంగా వినియోగించుకోవాలని తెలిపారు. శిక్షణలో భాగంగా ఉపాధ్యాయులు ఇనుప పాత్రలు వినియోగించడం, ప్లాస్టిక్ వ్యర్థాలను సేకరించి పునర్వినియోగానికి పంపడం ద్వారా పర్యావరణ స్పృహను చాటుకున్నారు. ఈ సందర్భంగా పదవీ విరమణకు చేరుకుంటున్న ఉపాధ్యాయుడు హట్కర్ సమ్మయ్యను సన్మానించారు. కాటారం ఉపవిభాగం నుండి నలభై మంది ఉపాధ్యాయులు పాల్గొన్నారు.