నాయకత్వం అంటే పదవి కాదు.. బాధ్యత

- సెయింట్ మేరీస్ విద్యానికేతలో విద్యార్థి నాయకుల ప్రమాణ స్వీకారం

గజ్వేల్: గజ్వేల్ ప్రజ్ఞాపూర్ మున్సిపాలిటీ పరిధిలోని సెయింట్ మేరీస్ విద్యానికేత హైస్కూల్‌లో విద్యార్థి నాయకుల ప్రమాణ స్వీకారోత్సవం ఘనంగా జరిగింది. ఈ కార్యక్రమానికి గజ్వేల్ సీఐలు రవికుమార్, సత్యనారాయణ ముఖ్య అతిథులుగా హాజరయ్యారు. ఈ సందర్భంగా వారు మాట్లాడుతూ, నాయకత్వం అంటే బ్యాడ్జి ధరించడం కాదని, అది ఒక బాధ్యత అని అన్నారు.

విద్యార్థి నాయకులు క్రమశిక్షణతో వ్యవహరిస్తూ తోటి విద్యార్థులకు ఆదర్శంగా నిలవాలని, సామాజిక మాధ్యమాలకు దూరంగా ఉండి చదువుపై దృష్టి సారించాలని సూచించారు. పాఠశాల కరస్పాండెంట్ గోపు ఇన్నారెడ్డి మాట్లాడుతూ, నాయకత్వ పదవి గౌరవంతో పాటు బాధ్యత కూడా అని, పాఠశాలను ప్లాస్టిక్ నిషేధిత పాఠశాలగా ప్రకటిస్తున్నట్లు తెలిపారు. కార్యక్రమంలో పాఠశాల డైరెక్టర్ థామస్ రెడ్డి, ప్రిన్సిపాల్ కాటరాయప్ప పాల్గొన్నారు. విద్యార్థి నాయకులుగా ఎన్నికైన వారు బాధ్యతలను నిజాయితీగా నిర్వహిస్తామని ప్రమాణం చేశారు.