స్లోవేకియా,(విజయక్రాంతి): స్లోవేకియాలోని డుడిన్స్‌లో జరిగిన డుడిన్స్కా 50 పోటీలో కామన్వెల్త్ క్రీడల పతక విజేత రేస్ వాకర్ ప్రియాంక గోస్వామి మహిళల 35 కి.మీ ఈవెంట్‌లో జాతీయ రికార్డు సృష్టించింది. మార్చిలో డుడిన్స్ వీధుల్లో ఏటా జరిగే ప్రపంచ అథ్లెటిక్స్ రేస్ వాకింగ్ టూర్ గోల్డ్ లేబుల్ మీట్ అయిన డుడిన్స్కా 50  44వ ఎడిషన్‌లో గోస్వామి శనివారం 2:56:34 సమయంలో 11వ స్థానంలో నిలిచింది. గతంలో ఆమె 3:13:19 సమయాన్ని నమోదు చేసింది.

రెండుసార్లు ఒలింపియన్ అయిన గోస్వామి, 2023లో రాంచీలో జరిగిన నేషనల్ ఓపెన్ రేస్ వాకింగ్ ఛాంపియన్‌షిప్‌లో మంజు రాణి నెలకొల్పిన 2:57:54 జాతీయ రికార్డును మెరుగుపరిచింది. మహిళల 35 కి.మీ రేస్ వాక్ ఈవెంట్‌ను ఈక్వెడార్‌కు చెందిన పౌలా మిలేనా టోర్రెస్ 2:44:26 సమయంతో గెలుచుకోగా, పెరూకు చెందిన కింబర్లీ గార్కా (2:45:59), పోలాండ్‌కు చెందిన కాటార్జినా జడ్జీబ్లో (2:46:59) వరుసగా రెండు, మూడవ స్థానాలను కైవసం చేసుకున్నారు.

29 ఏళ్ల గోస్వామి 20 కి.మీ రేస్ వాక్ జాతీయ రికార్డును 1:28:45 సమయంలో నమోదు చేసింది. దీనిని ఆమె 2021లో రాంచీలో జరిగిన జాతీయ రేస్ వాకింగ్ ఛాంపియన్‌షిప్‌లో నెలకొల్పారు. 2022 బర్మింగ్‌హామ్ కామన్వెల్త్ గేమ్స్‌లో 10,000 కి.మీ రేస్ వాక్ ఈవెంట్‌లో పోటీ చేసి రజతం గెలుచుకున్నారు. అదే సమయంలో జాతీయ రికార్డు హోల్డర్ ఆకాశ్‌దీప్ సింగ్ పురుషుల 20 కి.మీ రేస్ వాక్‌లో 1:24:13 సమయంతో ఆరో స్థానంలో నిలిచారు.