'Nasha Mukt Yuva’.. యువతకు ప్రధాని మోదీ పిలుపు

న్యూఢిల్లీ: 'అభివృద్ధి చెందిన భారత్' లక్ష్యాన్ని సాధించాలంటే దేశ యువత శారీరకంగానూ, మానసికంగానూ దృఢంగా ఉండాలని, ఇందుకోసం వారు అన్ని రకాల మాదకద్రవ్యాల వినియోగానికి దూరంగా ఉండాలని ప్రధాన మంత్రి నరేంద్ర మోదీ ఆదివారం పిలుపునిచ్చారు. యువతలో మాదకద్రవ్యాల వినియోగాన్ని నిర్మూలించే లక్ష్యంతో 'నశా ముక్త్ యువ ఫర్ వికసిత్ భారత్ సంకల్ప్ అభియాన్'ను(Nasha Mukt Yuva Abhiyan) ప్రారంభిస్తూ, ఈ ప్రచారం కేవలం యువత కోసమే కాకుండా వారి కుటుంబాలు, సమాజం, దేశం మొత్తానికి సంబంధించినదని ప్రధాని మోదీ పేర్కొన్నారు. ప్రభుత్వ పరీక్షల విధానంలో సంస్కరణలు కోరుతూ విద్యార్థులు చేపట్టిన భారీ నిరసనలు ఢిల్లీతో పాటు దేశంలోని ఇతర ప్రాంతాలను కుదిపేసిన కొద్ది రోజులకే, 'జెన్-జెడ్' (Gen-Z) ప్రతినిధులుగా చెప్పుకునే పెద్ద సంఖ్యలో యువత సమక్షంలో ప్రధానమంత్రి ఈ ప్రచార కార్యక్రమాన్ని వర్చువల్ విధానంలో ప్రారంభించారు. 

ఈ ప్రచారం యువతను మాదకద్రవ్యాల దుర్వినియోగానికి దూరంగా ఉండేలా ప్రేరేపించడం, వారి సమాజాలలో సానుకూల సామాజిక మార్పుకు రాయబారులుగా మారేలా ప్రోత్సహించడం లక్ష్యంగా పెట్టుకుందన్నారు.డ్రగ్స్ నిర్మూలనపై దేశవ్యాప్తంగా 100 వారాల పాటు కార్యక్రమాలు నిర్వహించనున్నారు. దీని కింద, మాదకద్రవ్య రహిత సమాజ నిర్మాణంలో అవగాహన కల్పించడానికి, ప్రజల భాగస్వామ్యాన్ని ప్రోత్సహించడానికి దేశవ్యాప్తంగా ప్రతి ఆదివారం కార్యక్రమాలు నిర్వహించబడతాయి.

ఈ కార్యక్రమాలలో క్రీడా కార్యక్రమాలు, వాకథాన్‌లు, ధ్యాన సెషన్‌లు, సాంస్కృతిక కార్యక్రమాలు, అవగాహన ప్రచారాలు, వీధి నాటకాలు, చర్చా వేదికలు, కళల పోటీలు, సామాజిక భాగస్వామ్య కార్యక్రమాలు ఉంటాయి. 'నషా ముక్త్ భారత్' (వ్యసన రహిత భారత్)ను నిర్మించాలన్న ప్రధాని మోదీ దార్శనికతకు అనుగుణంగా 2020లో 'నషా ముక్త్ భారత్ అభియాన్' ప్రారంభించబడిందని కేంద్ర క్రీడా, యువజన వ్యవహారాల శాఖ మంత్రి మన్సుఖ్ మాండవియా ఆ కార్యక్రమంలో పేర్కొన్నారు.