జనగణన హ్యాండ్‌బుక్‌కు ఖచ్చితమైన సమాచారం సేకరించాలి

వనపర్తి,(విజయక్రాంతి): జిల్లా జనగణన హ్యాండ్‌బుక్ (డీసీహెచ్‌బీ) రూపకల్పన కోసం గ్రామాల వారీగా ఖచ్చితమైన సమాచారాన్ని సేకరించాలని అదనపు కలెక్టర్ (రెవెన్యూ) వినోద్ కుమార్ ఆదేశించారు. జిల్లా కలెక్టరేట్‌లో టెక్నికల్ అసిస్టెంట్లు, పంచాయతీ కార్యదర్శులకు నిర్వహించిన శిక్షణ కార్యక్రమంలో ఆయన మాట్లాడుతూ... ఆగస్టు 10 నుంచి సెప్టెంబర్ 8 వరకు గ్రామ డైరెక్టరీ వివరాల సేకరణ చేపట్టనున్నట్లు తెలిపారు. విద్య, వైద్యం, తాగునీరు, రవాణా, వ్యవసాయం, సాగునీటి వనరులు తదితర వివరాలను సంబంధిత శాఖలతో సమన్వయం చేసుకుని మొబైల్ యాప్‌లో ఖచ్చితంగా నమోదు చేయాలని సూచించారు. కార్యక్రమంలో సీపీఓ హరికృష్ణ, జనగణన విభాగం అధికారులు, టెక్నికల్ అసిస్టెంట్లు పాల్గొన్నారు.