విద్యుత్ పెన్షనర్లపై ‘ఐఏఎస్’ కక్షసాధింపు.. సీఎం రేవంత్ రెడ్డి మాటలకు తూట్లు!

చరిత్రలో ఎన్నడూ లేనివిధంగా 8 రోజులుగా నిలిచిన పెన్షన్లు.. వృద్ధుల కన్నీరు

‘రైతు డిస్కమ్’ వాస్తవాలు చెప్పినందుకే పెద్ద సార్‌కు కోపమొచ్చిందా..?

మందులు కొనలేక, అప్పులు తీర్చలేక విలవిల్లాడుతున్న వృద్ధులు.. కరీంనగర్ పెన్షనర్ల సంఘం అగ్నిజ్వాలలు!

కరీంనగర్,(విజయక్రాంతి): తెలంగాణ రాష్ట్రం ఏర్పడిన తర్వాత విద్యుత్ శాఖ చరిత్రలో ఎన్నడూ జరగని పరిణామం చోటుచేసుకుంది. సాధారణంగా ప్రతి నెల ఒకటో తేదీన ఉద్యోగులతో పాటు పెన్షనర్ల ఖాతాల్లో కూడా జీతాలు, పెన్షన్లు జమ అవుతాయి. అయితే ఈసారి విద్యుత్ శాఖ పరిధిలోని టీజీఎస్పీడీసీఎల్, టీజీఎన్‌పీడీసీఎల్, ట్రాన్స్‌కో, జెన్‌కో సంస్థలకు చెందిన వేలాది మంది పెన్షనర్లకు జూన్ 6వ తేదీ వరకు కూడా పెన్షన్లు అందలేదు. దాదాపు రూ.180 కోట్లకు పైగా పెన్షన్ నిధులు విడుదల కాకపోవడంతో వృద్ధులు తీవ్ర ఇబ్బందులు ఎదుర్కొంటున్నారు.

‘పెద్ద సార్’ అహంకారానికి వృద్ధులు బలి!

విద్యుత్ శాఖ వర్గాల సమాచారం ప్రకారం, పెన్షన్ల నిలిపివేత వెనుక ఒక ఉన్నతాధికారి (ఐఏఎస్) కక్షసాధింపు ధోరణి ఉందన్న ఆరోపణలు వినిపిస్తున్నాయి. ఇటీవల ప్రభుత్వం ప్రతిపాదించిన ‘రైతు డిస్కమ్’ అంశంపై విద్యుత్ రంగానికి చెందిన కొందరు సీనియర్ పెన్షనర్లు ప్రెస్‌మీట్ నిర్వహించి తమ అభిప్రాయాలను వెల్లడించారు. సంస్థ భవిష్యత్తు, ఆర్థిక పరిస్థితులపై వాస్తవాలను ప్రజల ముందుంచినందుకే సంబంధిత ఉన్నతాధికారి ఆగ్రహానికి గురై, పెన్షన్ల విడుదలను అడ్డుకున్నారనే ప్రచారం విద్యుత్ వర్గాల్లో జోరుగా సాగుతోంది. ఈ వ్యవహారం ఇప్పుడు రాష్ట్రవ్యాప్తంగా చర్చనీయాంశంగా మారింది.

తలకిందులైన సీనియారిటీ క్రమం.. ఉద్యోగ సంఘాల మండిపాటు!

సాధారణంగా విద్యుత్ శాఖలో ముందుగా పెన్షనర్లకు చెల్లింపులు జరిపి, అనంతరం ఉద్యోగులు, అధికారులు తమ జీతాలను పొందడం ఆనవాయితీ. అయితే ఈసారి ఆ సంప్రదాయాన్ని పూర్తిగా పక్కనపెట్టినట్లు ఆరోపణలు ఉన్నాయి. ఉద్యోగులు, అధికారులు జీతాలు పొందినప్పటికీ పెన్షనర్లకు మాత్రం నిధులు విడుదల కాలేదు. దీంతో విద్యుత్ ఉద్యోగ సంఘాలు, జేఏసీ నాయకులు తీవ్ర అసంతృప్తి వ్యక్తం చేస్తున్నారు. వృద్ధుల సంక్షేమాన్ని విస్మరించడం సరికాదని, వెంటనే పెన్షన్లు విడుదల చేయాలని డిమాండ్ చేస్తున్నారు.

"ఆయన జేబులోంచి ఇస్తున్నారా?" – కరీంనగర్ పెన్షనర్ల సంఘం ఆగ్రహం

పెన్షన్ల జాప్యంపై కరీంనగర్ విద్యుత్ శాఖ పెన్షనర్ల సంక్షేమ సంఘం తీవ్ర ఆగ్రహం వ్యక్తం చేసింది. సంఘం అధ్యక్షుడు చీటి ప్రకాశ్ రావు, ప్రధాన కార్యదర్శి మహ్మద్ మక్బూల్ హుస్సేన్ సంయుక్తంగా విడుదల చేసిన ప్రకటనలో ప్రభుత్వ తీరును ప్రశ్నించారు. "విద్యుత్ శాఖ చరిత్రలో ఎన్నడూ లేనివిధంగా జీతాలు, పెన్షన్లు ఎనిమిది రోజులుగా నిలిచిపోయాయి. వయోభారంతో బాధపడుతున్న వృద్ధులు, గుండె, బీపీ, షుగర్ వంటి వ్యాధులతో ఇబ్బందులు పడుతున్న పెన్షనర్లు మందులు కొనుగోలు చేయలేని పరిస్థితికి చేరుకున్నారు. ఒక ఐఏఎస్ అధికారి వల్లే జీతాలు, పెన్షన్లు ఆగిపోయాయంటే ఆయన తన సొంత జేబులోంచి ఇస్తున్నారా? లేక ప్రభుత్వమే ఇస్తోందా?" అని వారు ప్రశ్నించారు.

ముఖ్యమంత్రి రేవంత్ రెడ్డి మాటకు విలువ లేదా..?

కాంగ్రెస్ ప్రభుత్వం అధికారంలోకి వచ్చిన తర్వాత ఉద్యోగులు, పెన్షనర్లకు ప్రతి నెల ఒకటో తేదీన జీతాలు, పెన్షన్లు అందేలా చర్యలు తీసుకుంటామని ముఖ్యమంత్రి ఎనుముల రేవంత్ రెడ్డి పలుమార్లు ప్రకటించారు. అయితే విద్యుత్ శాఖలో చోటుచేసుకున్న తాజా పరిణామాలు సీఎం ఇచ్చిన హామీలకు విరుద్ధంగా ఉన్నాయని పెన్షనర్లు ఆవేదన వ్యక్తం చేస్తున్నారు. ప్రభుత్వం వెంటనే జోక్యం చేసుకుని పెన్షన్ల సమస్యను పరిష్కరించాలని, బాధ్యులపై చర్యలు తీసుకోవాలని వారు డిమాండ్ చేస్తున్నారు.

తక్షణ డిమాండ్లు

విద్యుత్ శాఖ పెన్షనర్లకు పెండింగ్‌లో ఉన్న పెన్షన్ నిధులను అత్యవసర ప్రాతిపదికన వెంటనే విడుదల చేయాలి.పెన్షన్ల జాప్యానికి కారణమైన అంశాలపై సమగ్ర విచారణ జరిపి బాధ్యులపై కఠిన చర్యలు తీసుకోవాలి. వృద్ధుల సంక్షేమాన్ని దృష్టిలో ఉంచుకుని భవిష్యత్తులో ఇలాంటి పరిస్థితులు పునరావృతం కాకుండా ప్రభుత్వం స్పష్టమైన విధానాన్ని రూపొందించాలి.