శ్రీ వేణుగోపాలస్వామి ఆలయంలో ఎమ్మెల్యే ప్రత్యేక పూజలు

 రావిచేడ్‌లో ఎస్‌ఐఆర్  ప్రక్రియ సమావేశానికి హాజరు​

ఆమనగల్లు, అగస్టు29(విజయక్రాంతి):  కల్వకుర్తి నియోజకవర్గ శాసనసభ్యులు కసిరెడ్డి నారాయణరెడ్డి శనివారం పలు అభివృద్ధి, స్థానిక కార్యక్రమాల్లో చురుగ్గా పాల్గొన్నారు. ఇందులో భాగంగా మక్తమాదారం గ్రామ పంచాయతీలోని వేణుగోపాలస్వామి ఆలయాన్ని దర్శించుకున్న ఎమ్మెల్యే, స్వామి వారికి ప్రత్యేక పూజలు నిర్వహించి ఆశీస్సులు అందుకున్నారు.​ అనంతరం, రావిచేడ్ గ్రామ పంచాయతీలో కొనసాగుతున్న ఎస్‌ఐఆర్  ప్రక్రియపై నిర్వహించిన సమావేశంలో ఆయన పాల్గొన్నారు.

గ్రామంలో ఎస్‌ఐఆర్ నమోదు ఏ విధంగా జరుగుతోంది, క్షేత్రస్థాయి పరిశీలన ఎంతవరకు వచ్చిందనే వివరాలను అధికారులను అడిగి తెలుసుకున్నారు. ఈ సందర్భంగా గ్రామస్తులతో ప్రక్రియకు సంబంధించిన పలు అంశాలపై చర్చించారు. ​ఈ సందర్భంగా ఎమ్మెల్యే కసిరెడ్డి నారాయణరెడ్డి మాట్లాడుతూ... ఎస్‌ఐఆర్ ప్రక్రియలో ప్రజలకు ఎలాంటి ఇబ్బందులు తలెత్తకుండా చూడాలని అధికారులకు స్పష్టం చేశారు. గ్రామస్తులందరికీ అవసరమైన పూర్తి సమాచారాన్ని అందిస్తూ, సందేహాలను నివృత్తి చేయాలన్నారు. ప్రభుత్వం నిర్దేశించిన నిర్ణీత గడువు తేదీలోపే ఈ ప్రక్రియను ఎలాంటి పొరపాట్లు లేకుండా విజయవంతంగా పూర్తి చేయాలని సంబంధిత అధికారులను ఆదేశించారు. కార్యక్రమంలో స్థానిక ప్రజాప్రతినిధులు, అధికారులు, గ్రామ పెద్దలు మరియు ప్రజలు పెద్ద సంఖ్యలో పాల్గొన్నారు.