మంథనిలో ప్రశాంతంగా ముగిసిన గీత పారిశ్రామిక సహకార సంఘం ఎన్నికలు

మంథని,(విజయక్రాంతి): మంథని గీత పారిశ్రామిక సహకార సంఘం ఎన్నికలు సోమవారం ప్రశాంతంగా ముగిశాయి. సుమారు 50 సంవత్సరాల సుదీర్ఘ చరిత్ర కలిగిన ఈ సంఘానికి, తొలిసారిగా ప్రత్యక్ష ఎన్నికలు నిర్వహించడం స్థానికంగా గమనార్హం. మంథని, గంగాపూరి, సూరయ్యపల్లె గ్రామాలకు చెందిన మొత్తం 151 మంది ఓటర్లు తమ ఓటు హక్కును వినియోగించుకున్నారు. స్థానిక రేణుక ఎల్లమ్మ ఆలయ ఆవరణలో ఏర్పాటు చేసిన పోలింగ్ కేంద్రంలో ఉదయం 9 గంటలకు ఓటింగ్ ప్రక్రియ ప్రారంభమై, మధ్యాహ్నం 2 గంటల వరకు కొనసాగింది. పోలీసులు కట్టుదిట్టమైన బందోబస్తు ఏర్పాటు చేయడంతో ఓటింగ్ ఎటువంటి అవాంఛనీయ సంఘటనలు లేకుండా ప్రశాంతంగా జరిగింది. అనంతరం మధ్యాహ్నం 3 గంటలకు ఓట్ల లెక్కింపు చేపట్టారు.

విజేతల వివరాలు

ఈ ఎన్నికల బరిలో మొత్తం 11 మంది అభ్యర్థులు నిలవగా, ఎన్నికల ఫలితాల్లో డైరెక్టర్లుగా ఈ క్రింది వారు విజయం సాధించారు. 

ఎంపికైన డైరెక్టర్లు:

ఎగోలపు శంకర్ గౌడ, కొండ్ర రాజయ్య గౌడ్, కమ్మగొని శంకర్ గౌడ్, మాచిడి సత్యనారాయణ గౌడ్, తాటి సమ్మయ్య గౌడ్, మాచిడి వీర శంకర్ గౌడ్, మాచిడి నరేష్ గౌడ్ మరియు తాటి మల్లయ్య గౌడ్.

ఏకగ్రీవ విజేతలు

 మహిళా కోటాలో తాటి కౌశల్య, ఆరెల్లి సమ్మక్క ఏకగ్రీవంగా ఎన్నికయ్యారు. ఈ ఎన్నికల ప్రక్రియను ఎలక్షన్ అధికారి అహమ్మద్ అలీ, అధ్యక్షులు ఎన్. వెంకటేశ్వర్లు పర్యవేక్షించారు. సహాయ ఎన్నికల అధికారులుగా కే. అనిల్ కుమార్, హెచ్. సత్యనారాయణలు వ్యవహరించారు. సుదీర్ఘ కాలం తర్వాత జరిగిన ఈ ప్రత్యక్ష ఎన్నికలు గౌడ సంఘం సభ్యుల్లో కొత్త ఉత్సాహాన్ని నింపాయి.