నిర్దేశిత కక్షలోకి ‘దృష్టి’

1. కక్షలోకి ఆప్టో-సార్ ఉపగ్రహం
2. అంతరిక్ష పరిశోధన రంగంలో భారత్ కొత్త రికార్డు 

న్యూయార్క్, మే ౩: భారతీయ అంతరిక్ష పరిశోధన రంగంలో ఆదివారం ఒక చారిత్రాత్మక ఘట్టం ఆవిష్కృతమైంది. బెంగళూరుకు చెందిన స్టార్టప్ ‘గెలాక్సీ ఐ’ రూపొందించిన ‘మిషన్ దృష్టి’ ఉపగ్రహం విజయవంతంగా నింగిలోకి దూసుకెళ్లింది. కాలిఫోర్నియాలోని స్పేస్‌ఎక్స్ ఫాల్కన్- 9 రాకెట్ ద్వారా చేపట్టిన ప్రయోగం విజయవంతమైంది. 190 కిలోల బరువున్న ఈ ఉపగ్రహం భారత్ నుంచి ప్రైవేట్ రంగంలో తయారైన అతిపెద్ద ఎర్త్ అబ్జర్వేషన్ శాటిలైట్‌గా రికార్డు సృష్టించింది.

ప్రపంచంలోనే మొదటిసారిగా ఆప్టికల్ కెమె రా, సింథటిక్ అపెర్చర్ రాడార్ (ఆప్టోసార్) సాంకేతికతతో ప్రయోగించడం దీని ప్రత్యేకత. ఈ సాంకేతికతతో అంతరిక్షంలో వాతావరణం ఎలా ఉన్నా దూరం నుంచి భూమికి సంబంధించిన చిత్రాలు తీయడం సాధ్యమవుతుంది. సాధారణ ఉపగ్రహాలు మేఘాల చాటున ఉన్నా లేదా చీకటిలో ఉన్నా స్పష్టమైన ఫొటోలు తీయలేవు.

కానీ, ఆప్టో-సార్ సాంకేతికత ఆ అడ్డంకులను అధిగమించి హై-రెజల్యూ షన్ (హెచ్‌డీ) చిత్రాలను అందిస్తుంది. ఉపగ్రహం ద్వారా వచ్చే డేటాతో వ్యవసాయం, విపత్తు నిర్వహణ, పర్యావరణ పరిరక్షణ, రక్షణ రంగాలకు విశిష్ట సేవలు అందుతాయి. మరోవైపు, ఈ విజయంపై భారత అంతరిక్ష పరిశోధనా సంస్థ (ఇస్రో) హర్షం వ్యక్తం చేసింది. అలాగే ‘గెలాక్సీ ఐ’ బందాన్నీ అభినందించింది.