నాగర్‌కర్నూల్‌లో ఘనంగా దీక్షా దివస్‌

నాగర్‌కర్నూల్‌ (విజయక్రాంతి): జిల్లా కేంద్రంలోని బీఆర్ఎస్ పార్టీ కార్యాలయంలో దీక్షా దివస్ కార్యక్రమాన్ని జరిపారు. మాజీ ఎమ్మెల్యేలు మర్రి జనార్దన్ రెడ్డి, బీరం హర్షవర్ధన్ రెడ్డి, నాయకులు నాగం శశిధర్ రెడ్డి, బైకని శ్రీనివాస్ యాదవ్, ఉద్యమకారులు పాల్గొన్నారు. అంబేద్కర్ విగ్రహానికి, తెలంగాణ తల్లి విగ్రహాలకు, అమరవీరుల స్థూపానికి నివాళులు అర్పించారు. కేసీఆర్ చిత్రపటానికి పూలాభిషేకం చేపట్టారు. ఈ సందర్భంగా మర్రి జనార్దన్ రెడ్డి మాట్లాడుతూ కేసీఆర్ ఆమరణ నిరాహార దీక్షతో మలిదశ ఉద్యమం మళ్లీ జ్వాలలు రగిలిందన్నారు. ప్రజల పోరాటం, విద్యార్థుల త్యాగాలతో కేంద్రం తెలంగాణ రాష్ట్రాన్ని ప్రకటించిందన్నారు. కేసీఆర్ త్యాగం, పోరాట పటిమ వల్లే తెలంగాణ సాధ్యమైందన్నారు. ఉద్యమ జ్ఞాపకాలు, స్ఫూర్తి ప్రతి ఒక్కరిలో నిలవాలని పిలుపునిచ్చారు.