కామ్రేడ్ అరుణోదయ నాగన్న మృతి ఉద్యమానికి తీరని లోటు

తిరుమలాయపాలెం,(విజయక్రాంతి): కామ్రేడ్ అరుణోదయ నాగన్న మృతి ఉద్యమానికి తీరని లోటని అరుణోదయ కళాకారుల బృందం పేర్కొన్నారు. చిన్నతనం నుంచే విప్లవ రాజకీయాల పట్ల ఆకర్షితులైన నాగన్న, ఎమర్జెన్సీ కాలంలో కామ్రేడ్ శ్రీహరి అడుగుజాడల్లో నడుస్తూ తన తుది శ్వాస వరకు ఉద్యమానికి అంకితభావంతో సేవలందించారని కొనియాడారు. నాగన్న మరణం ఉద్యమ శ్రేణులకు, కుటుంబ సభ్యులకు తీరని లోటని అన్నారు. చిన్ననాటి నుంచే తమ కుటుంబంలో ఒక సభ్యుడిలా కలిసి ఉద్యమ బాటలో నడిచిన నాగన్న ఇక లేరనే విషయం తీవ్రంగా కలచివేసిందని ఆవేదన వ్యక్తం చేశారు. కామ్రేడ్ అరుణోదయ నాగన్నకు విప్లవ జోహార్లు అర్పిస్తూ, వారి కుటుంబ సభ్యులకు ప్రగాఢ సానుభూతిని తెలియజేస్తున్నట్లు తెలంగాణ కళాకారుల బృందం పేర్కొన్నారు.