కొలంబో: శ్రీలంక ఉత్తర(Northern Sri Lanka) ప్రాంతంలోని తలైమన్నార్ వద్ద గురువారం ద్వీప దేశ జలాల్లో అక్రమంగా చేపలు పట్టారనే ఆరోపణలతో 47 మంది భారతీయ మత్స్యకారులను(Indian fishermen) అరెస్టు చేసి, వారి ఐదు ట్రాలర్లను స్వాధీనం చేసుకున్నట్లు నావికాదళం(Sri Lankan Navy) తెలిపింది. మన్నార్, డెల్ఫ్ట్ సముద్ర ప్రాంతాలలో నిర్వహించిన సమన్వయ గస్తీ సమయంలో ఈ అరెస్టులు జరిగాయి. అరెస్టు చేసిన 47 మంది మత్స్యకారులను, వారి పరికరాలను తదుపరి చర్యల కోసం ఉత్తరాన ఉన్న మత్స్యకార తనిఖీ కేంద్రానికి అప్పగిస్తామని నేవీ తెలిపింది.

 వారిని అరెస్టు చేయడానికి నావల్ కమాండ్ ఆపరేషన్ నిన్న రాత్రి ప్రారంభమై గురువారం తెల్లవారుజాము వరకు కొనసాగిందని నేవీ ప్రతినిధి కమాండర్ బుద్దిక సంపత్ తెలిపారు. భారతదేశం-శ్రీలంక ద్వైపాక్షిక సంబంధాలలో మత్స్యకారుల సమస్య వివాదాస్పదంగా ఉన్న విషయం తెలిసిందే. శ్రీలంక నావికాదళ సిబ్బంది పాక్ జలసంధిలో భారత మత్స్యకారులపై కాల్పులు జరిపి, శ్రీలంక ప్రాదేశిక జలాల్లోకి అక్రమంగా ప్రవేశించారనే ఆరోపణలతో అనేక సంఘటనలలో వారి పడవలను స్వాధీనం చేసుకున్నారు. గత నెలలో, ఉత్తర శ్రీలంకలోని జాఫ్నా సమీపంలో 12 మంది భారతీయ జాలర్లను అరెస్టు చేసి, వారి పడవను స్వాధీనం చేసుకున్నారు.