శివాలయంలో తొక్కిసలాట: ఏడుగురు మృతి

లఖీసరాయ్: బీహార్‌లోని లఖీసరాయ్ జిల్లాలో తీవ్ర విషాదం చోటుచేసుకుంది. అశోక్ ధామ్ ఆలయంలో(Ashok Dham temple) సోమవారం జరిగిన తొక్కిసలాటలో కనీసం ఆరుగురు మరణించగా, మరికొందరు గాయపడ్డారని అధికారులు తెలిపారు. పవిత్ర శ్రావణ మాసంలోని మూడవ సోమవారం సందర్భంగా 'జలాభిషేకం' చేయడానికి ఆలయానికి వేలాది మంది భక్తులు అశోక్ ధామ్ ఆలయానికి భారీగా తరలిరావడం వల్ల ఈ సంఘటన చోటుచేసుకుంది. ఈ విషాద ఘటనపై సబ్-డివిజనల్ పోలీస్ ఆఫీసర్ (SDPO) శివం కుమార్ మాట్లాడుతూ, "సోమవారం ఉదయం లఖీసరాయ్‌లోని అశోక్ ధామ్ ఆలయంలో జరిగిన తొక్కిసలాటలో కనీసం ఆరుగురు భక్తులు మరణించారు. పోలీసు సిబ్బంది మరియు జిల్లా యంత్రాంగం అధికారులు ఘటనా స్థలానికి చేరుకున్నారు, సహాయక చర్యలు కొనసాగుతున్నాయి" అని తెలిపారు.

ఘటన గురించి సమాచారం అందిన వెంటనే, పోలీసులు, పరిపాలనా అధికారులు హుటాహుటిన ఘటనా స్థలానికి చేరుకున్నారు. సహాయక చర్యలు ప్రారంభించడంతో పాటు, గాయపడిన వారిని చికిత్స కోసం సమీపంలోని ఆసుపత్రులకు తరలించే ఏర్పాట్లు చేశారు. పరిపాలనా అధికారులు ఘటనా స్థలానికి చేరుకుని, సహాయక చర్యలు, జనసందోహ నియంత్రణ పనులను పర్యవేక్షిస్తున్నారు. ఉదయం 6:30 నుండి 6:45 గంటల మధ్య రెండు రైళ్లు రావడంతో భక్తుల రద్దీ అసాధారణంగా పెరిగి, ఆలయం బయట ఉన్న బారికేడ్లు కూలిపోయాయని లఖీసరాయ్ జిల్లా మేజిస్ట్రేట్ శైలేంద్ర కుమార్ తెలిపారు. అశోక్ ధామ్ ఆలయాన్ని 'శ్రీ ఇంద్రదమనేశ్వర మహాదేవ ఆలయం' అని కూడా పిలుస్తారు. ఇందులో ఒక పెద్ద శివలింగం ఉంది. ఈ ఆలయం భక్తులను, ముఖ్యంగా పవిత్రమైన శ్రావణ మాసంలో, పెద్ద సంఖ్యలో ఆకర్షిస్తుంది. హిందూమతంలో శ్రావణ మాసానికి గొప్ప ఆధ్యాత్మిక ప్రాముఖ్యత ఉంది. ఇది సంవత్సరంలో అత్యంత పవిత్రమైన కాలాలలో ఒకటిగా పరిగణించబడుతున్న విషయం తెలిసిందే.