హైదరాబాద్: జగిత్యాల జిల్లాలోని రాయికల్ మున్సిపాలిటీలో(Raikal Municipality) కాంగ్రెస్ నేతల్లో అసమ్మతి నెలకొంది. టికెట్ల కేటాయింపులో న్యాయం జరగలేదని పలువురు ఆగ్రహం వ్యక్తం చేస్తున్నారు. కాంగ్రెస్ కు రాయికల్ పట్టణ మహిళా అధ్యక్షురాలు తాటిపాముల మమత రాజీనామా చేశారు. టికెట్ల కేటాయింపు సరిగా జరగలేదని కాంగ్రెస్ అభ్యర్థి మేకల రమేశ్ నిరసన వ్యక్తం చేశారు. బీఫాం దక్కినప్పటికీ పోటీ నుంచి తప్పుకుంటున్నట్లు మేకల రమేశ్ ప్రకటించారు.

జగిత్యాల మున్సిపల్ ఎన్నికల నేపథ్యంలో సీనియర్ కాంగ్రెస్ నాయకుడు టి. జీవన్ రెడ్డికి(Senior Congress leader Jeevan Reddy), జగిత్యాల ఎమ్మెల్యే డాక్టర్ సంజయ్ కుమార్ మధ్య విభేదాలు తీవ్రమయ్యాయి. గత రెండు సంవత్సరాలుగా ఆ ఇద్దరు నాయకుల మధ్య తీవ్ర విభేదాలు నెలకొన్నాయి. జగిత్యాల మున్సిపల్ ఎన్నికలలో ఎమ్మెల్యే వర్గానికి ఎక్కువ టిక్కెట్లు కేటాయించాలన్న కాంగ్రెస్ పార్టీ నిర్ణయం తర్వాత ఈ విభేదాలు మరింత తీవ్రమయ్యాయి. 

జగిత్యాల మున్సిపాలిటీలో(Jagtial Municipality) 50 డివిజన్లు ఉన్నాయి. పార్టీ 30 టిక్కెట్లను ఎమ్మెల్యే వర్గానికి, మిగిలిన 20 టిక్కెట్లను జీవన్ రెడ్డి అనుచరులకు కేటాయించాలని నిర్ణయించారు. ఈ నిర్ణయంతో ఆగ్రహించిన జీవన్ రెడ్డి, పార్టీ నాయకత్వానికి తన తీవ్ర అసంతృప్తిని తెలియజేశారు. విషయం తెలుసుకున్న తర్వాత, నామినేషన్ల ఉపసంహరణకు చివరి రోజైన మంగళవారం జీవన్ రెడ్డి అనుచరులు జగిత్యాలలోని ఆయన నివాసం వద్ద పెద్ద సంఖ్యలో గుమిగూడి తమ నిరసనను తెలియజేశారు.