మన్ కీ బాత్: భారత క్రీడాకారులపై మోదీ ప్రశంసలు

న్యూఢిల్లీ: ప్రధానమంత్రి నరేంద్ర మోదీ ఆదివారం తన నెలవారీ రేడియో కార్యక్రమం 'మన్ కీ బాత్' 134వ సంచిక ద్వారా భారతదేశంలోని, విదేశాలలోని పౌరులను ఉద్దేశించి ప్రసంగించారు. 2014లో ప్రారంభమైనప్పటి నుండి మన్ కీ బాత్ ప్రభుత్వ అత్యంత ప్రముఖ ప్రజా సంప్రదింపు కార్యక్రమాలలో ఒకటిగా అవతరించింది. ఇటీవల జార్ఖండ్‌లోని రాంచీలో జరిగిన జాతీయ సీనియర్ అథ్లెటిక్స్ ఫెడరేషన్ పోటీల గురించి మోదీ ప్రస్తావించారు. నాలుగు విభాగాల్లో భారత క్రీడాకారులు అద్భుతమైన ప్రదర్శనలు చేసి రికార్డులు సృష్టించారని, దేశానికి గర్వకారణంగా నిలిచారని ప్రశంసించారు. వారి కృషి కొత్త ప్రమాణాలను నెలకొల్పుతూ, తర్వాతి తరం క్రీడాకారులకు స్ఫూర్తినిస్తోందని ఆయన పేర్కొన్నారు.

గురిందర్‌వీర్ సింగ్, విశాల్ టికె, తేజస్విన్ శంకర్, దేవ్ మీనా మరియు కుల్దీప్ కుమార్ అనే అథ్లెట్లు తమ తమ విభాగాలలో కొత్త మైలురాళ్లను సాధించారు. 100 మీటర్ల పరుగు పందెంలో కేవలం రెండు రోజుల వ్యవధిలోనే మూడుసార్లు జాతీయ రికార్డు సాధించడం అద్భుతమైన ఘనత అని ప్రధాని మోదీ ప్రత్యేకంగా ప్రస్తావించారు. గురిందర్‌వీర్ సింగ్, అనిమేష్ కుజూర్ తమ విశిష్ట ప్రదర్శనల ద్వారా ప్రత్యేక గుర్తింపు పొందారని పేర్కొంటూ, ఇటువంటి విజయాలు భారత అథ్లెటిక్స్ పెరుగుతున్న బలాన్ని ప్రతిబింబిస్తున్నాయని ఆయన హర్షం వ్యక్తం చేశారు. అంతే కాకుండా మన్ కీ బాత్ లో గర్వీందర్, అనిమేష్ తో ప్రధాని మాట్లాడారు.

క్రీడా విజయాలతో పాటు తీవ్రమైన వడగాలుల పరిస్థితులను ఎదుర్కోవడానికి ప్రధాని మోదీ మార్గదర్శకాలను కూడా పంచుకున్నారు. తీవ్రమైన ఉష్ణోగ్రతల సమయంలో అప్రమత్తంగా ఉండాలని, తమను తాము రక్షించుకోవడానికి గరిష్ట జాగ్రత్తలు తీసుకోవాలని ఆయన కోరారు. వడగాలుల ప్రమాదాల గురించి హెచ్చరిస్తూ, వేడి సంబంధిత అనారోగ్యాలను నివారించడానికి తగినంత నీరు తాగడం, అనవసరంగా వేడికి గురికాకుండా ఉండటం, భద్రతా చర్యలు పాటించాలని ప్రధానమంత్రి చెప్పారు.