26 July, 2026 | 2:12 AM 
ఓటీటీ ఫ్యాషన్!
- తెరపై కనిపించే ఆభరణాలు మెడలో మెరవాల్సిందే
- మారుతున్న యువత అభిరుచి
- ఓటీటీ పాత్రలే ట్రెండ్ సెటర్లు
- తగ్గుతున్న బాలీవుడ్ ప్రభావం
- మార్కెట్ను శాసిస్తున్న అంతర్జాతీయ స్ట్రీమింగ్ షోలు
ఆభరణాల ఎంపికపై దశాబ్దాలుగా కొనసాగుతున్న బాలీవుడ్ ప్రభావం క్రమంగా తగ్గుతోంది. ముఖ్యంగా.. యువత ఇప్పుడు అంతర్జాతీయ ఓటీటీ షోలు, వెబ్ సిరీస్లలో కనిపించే ఫ్యాషన్, ఆభరణాల వైపు మొగ్గుచూపుతున్నారు. బ్రిడ్జర్టన్ తరహా టెన్నిస్ బ్రేస్లెట్లు, ఎమిలీ ఇన్ పారిస్ స్ఫూర్తితో మినిమలిస్ట్ ఆభరణాలు, సిట్కామ్ ఫ్రెండ్స్లో కనిపించిన ఉంగరాలను పోలిన ఎంగేజ్మెంట్ రింగ్స్కు యువ వినియోగదారుల నుంచి డిమాండ్ పెరుగుతోంది. గ్లోబల్ స్ట్రీమింగ్ షోల ప్రభావం కారణంగా వచ్చిన మార్పు దేశంలోని సుమారు రూ. 90,000 కోట్ల వజ్రాభరణాల మార్కెట్ను కొత్త దిశలో నడిపిస్తోంది.
ఈ మార్కెట్లో స్టడెడ్ ఆభరణాల వాటా సుమారు 62 శాతంగా ఉంది. ప్రముఖ జ్యువెలరీ సంస్థలు ఏప్రిల్ త్రైమాసికంలో స్టడెడ్ డైమండ్ ఆభరణాల విక్రయాల్లో గత ఏడాదితో పోలిస్తే 20 నుంచి 43 శాతం వరకు వృద్ధిని నమోదు చేయడం గమనార్హం. అంతర్జాతీయ ఫ్యాషన్కు అనుగుణంగా ట్రెండీ డైమండ్ ఆభరణాలు ప్రస్తుతం తమ విక్రయాల్లో దాదాపు 40 శాతం వాటా కలిగి ఉన్నాయని పాప్లీ అండ్ సన్స్ మేనేజింగ్ డైరెక్టర్ రాజీవ్ పాప్లీ తెలిపారు. ఏడాది క్రితం ఈవాటా 15- శాతం మాత్రమేనని చెప్పారు. జెజ్ జడ్తో పాటు మిలీనియల్స్ కూడా అంతర్జాతీయ వెబ్సిరీస్లలో కనిపించే డిజైన్లను కోరుతున్నారని పేర్కొన్నారు.
హైదరాబాద్, (విజయక్రాంతి): ఆభరణాల కొనుగోలును ప్రభావితం చేసే శక్తివంతమైన ట్రెండ్సెట్టర్లుగా ఓటీటీ వేదికలు మారాయని జ్యూవెలరీ రంగం అభిప్రాయపడుతోంది. ఎమిలీ ఇన్ పారిస్, బ్రిడ్జర్టన్ వంటి షోలు యువత ఫ్యాషన్, ఆభరణాల అభిరుచులపై గణనీయమైన ప్రభావం చూపుతున్నాయి. సోషల్ మీడియా ఈ ట్రెండ్లను మరింత వేగంగా విస్తరిస్తోంది. వినియోగదారులు తెరపై చూసిన ఆభరణాలను తిరిగి సృష్టిం చుకోవడంతో పాటు, వాటికి తమదైన ప్రత్యేక తను జోడించేందుకు ఆసక్తి చూపుతున్నారని క్యారట్లేన్ చీఫ్ మార్కెటింగ్ ఆఫీసర్ షఫాలి గౌతమ్ తెలిపారు.
మారుతున్న ట్రెండ్
కొన్నేళ్ల క్రితం వరకు బాలీవుడ్ ప్రముఖులు, అత్యంత వైభవంగా కనిపించే వివాహ ఆభరణాలే మార్కెట్ ట్రెండ్లను శాసించేవి. ఐశ్వర్యరాయ్ వివాహానంతరం ఆమె ధరించిన కియారా అద్వానీ తరహా లేయర్డ్ డైమండ్- ఎమరాల్డ్ బ్రైడల్ నెక్లెస్ అత్యధికంగా కోరుకున్న డిజైన్లలో ఒకటిగా నిలిచింది. అయితే ప్రస్తుతం పరిస్థితి మారుతోంది. సంపన్నులు, పెళ్లి ఆభరణాల కొనుగోలుదారులు కూడా భారీ స్టేట్మెంట్ ఆభరణాల స్థానంలో తేలికగా ధరించగలిగే ఎమరాల్డ్ జ్యువెలరీని ఎంచుకుంటున్నారు.
నెట్ఫ్లిక్స్ సిరీస్లలో కనిపించిన ఆభరణాల ఫొటోలు, స్క్రీన్షాట్లతో నేరుగా జ్యువెలరీ దుకాణాలకు వస్తున్న వినియోగదారుల సంఖ్య కూడా పెరుగుతోందని వ్యాపారులు చెబుతున్నారు. బంగారం ధరల పెరుగుదల కూడా తేలికైన, సులభంగా ధరించగలిగే ఆభరణాల వైపు వినియోగదారులు దృష్టి సారించేలా చేసింది. గత ఏడాది కాలం లో స్టడెడ్, ఇల్యూషన్-సెట్ ఆభరణాలపై వినియోగదారులు ఆరా తీయడమనేది దాదాపు ఒకటిన్నర నుంచి రెండింతలు వేగంగా పెరిగాయని జెన్ డైమండ్ ఇండియా మేనేజింగ్ డైరెక్టర్ నీల్ సోనావాలా తెలిపారు.
40 ఏళ్ల వయసులోపు వారే అధికం
ప్రస్తుతం జెన్ డైమండ్ ఇండియా కస్టమర్ బేస్లో దాదా పు 55 శాతం వరకు 40 ఏళ్ల లోపువారే ఉన్నారు. 2024లో ఈ వాటా సుమారు 40 శాతంగా ఉండేది. ముఖ్యంగా యువ కొనుగోలుదారుల్లో తేలికైన బంగారు ఆభరణాల వైపు దృష్టి పెట్టినట్టు స్పష్టమైన మార్పు కనిపిస్తోందని క్యారట్లేన్ పేర్కొంది. ఆభరణాలను లాకర్లలో భద్రపరిచే విలువైన వస్తువులుగా కాకుండా, రోజువారీ ఫ్యాషన్లో భాగంగా ధరించే ధోరణి పెరుగుతోందని తెలిపింది.
మిలీనియల్స్, జెన్టీ వినియోగదారులు ఇప్పుడు ఆభరణాలను కేవలం పెట్టుబడిగా కాకుండా తమ వ్యక్తిత్వాన్ని వ్యక్తీకరించే సాధనంగా చూస్తున్నారని పరిశ్రమ వర్గాలు చెబుతున్నాయి. ఉంగరాలు, చెవిపోగులు, ఒకదానిపై మరొకటి ధరించే బ్రేస్లెట్లు, లేయర్డ్ నెక్లెస్ల కొనుగోలు పెరుగుతోంది. సొంతంగా వినియోగించడంతోపాటు తమకు తామే బహుమతులు కొనుగోలు చేసుకునే ధోరణి కూడా బలపడుతోంది. ఒకప్పుడు ప్రత్యేక సందర్భాలకు మాత్రమే పరిమితమైన ఆభరణాల కొనుగోలు.. ఇప్పుడు రోజువారీ స్వీయ వ్యక్తీకరణలో భాగంగా మారిందని గౌతమ్ పేర్కొన్నారు.
మార్కెట్కు కొత్త ఊపు
యువ వినియోగదారులు ఆభరణాలను రోజువారీ ఫ్యాష న్ యాక్సెసరీగా ఉపయోగిస్తూ, స్టాకింగ్, లేయరింగ్, విభిన్న స్టైల్స్ను కలిపి ధరించడంపై ఆసక్తి చూపుతున్నారు.ప్రస్తుతం ఉంగరాలు, చెవిపోగులు అత్యధికంగా అమ్ముడవుతున్న విభాగాలుగా కొనసాగుతున్నప్పటికీ... స్టాకబుల్, లేయర్డ్ జ్యువెలరీ వేగంగా వృద్ధి చెందుతోంది. కార్యాలయం నుంచి సాయంత్రం నిర్వహించే వేడుకల వరకు వివిధ సందర్భాల్లో ధరించే బహుముఖ ఆభరణాలపై వినియోగదారుల ఆసక్తి పెరుగుతుండటం ఈ మార్కెట్కు కొత్త ఊపునిస్తోంది.
