తెలంగాణలో భారత జనగణన-2027 ప్రారంభం

హైదరాబాద్: 2027 జనాభా గణన (Census) స్వయ నమోదు ప్రక్రియ తెలంగాణలో ఆదివారం ప్రారంభమైంది. ఇక్కడి లోక్ భవన్‌లో, ఆన్‌లైన్ స్వయ నమోదు సదుపాయం ద్వారా తన వివరాలను నమోదు చేసుకోవడం ద్వారా తెలంగాణ గవర్నర్ శివ్ ప్రతాప్ శుక్లా రాష్ట్రంలో భారత జనగణన – 2027, (Census of India–2027)ను లాంఛనంగా ప్రారంభించారు. ఈ సందర్భంగా తెలంగాణ ప్రజలను ఉద్దేశించి గవర్నర్ శివ్ ప్రతాప్ శుక్లా మాట్లాడారు. జనాభా, వారి సామాజిక-ఆర్థిక పరిస్థితులకు సంబంధించిన సమగ్ర సర్వేను జనగణన అని లోక్ భవన్ విడుదల చేసినట్లు గవర్నర్ తెలిపారు.

ఇది ప్రణాళిక, సుపరిపాలన, వనరుల సమన్యాయ పంపిణీకి పునాదిగా నిలుస్తుందని, తద్వారా అభివృద్ధి ఫలాలు సమాజంలోని ప్రతి వర్గానికి చేరేలా ఇది భరోసా ఇస్తుందని ఆయన పేర్కొన్నారు. విద్య, ఆరోగ్యం, ఉపాధి, గృహనిర్మాణం, మౌలిక సదుపాయాలకు సంబంధించిన విధానాలను రూపొందించడంలో జనాభా గణన కీలక పాత్ర పోషిస్తుందని గవర్నర్ చెప్పారు. ఖచ్చితమైన గణాంకాలు, ప్రభుత్వం నిర్దిష్ట సంక్షేమ పథకాలను రూపొందించడానికి, జాతీయ పురోగతిని సమర్థవంతంగా అంచనా వేయడానికి వీలు కల్పిస్తాయి.

తెలంగాణ రాష్ట్ర ఏర్పాటు తర్వాత జరుగుతున్న మొట్టమొదటి జనగణన ఇదే కావడంతో, రాష్ట్ర భవిష్యత్తు అభివృద్ధి, పురోగతికి ఎంతో ప్రాధాన్యతను సంతరించుకుంటుందని, అందుకే కచ్చితమైన గణాంకాల సేకరణ అత్యంత ఆవశ్యకమన్నారు. తెలంగాణలో స్వయం-గణన (self-enumeration) ప్రక్రియ ఏప్రిల్ 26 నుండి మే 10 వరకు నిర్వహించబడుతుందని గవర్నర్ వివరించారు. మే 11 నుండి జూన్ 9 వరకు గృహాల జాబితా సేకరణ ప్రక్రియ (house-listing operations) జరగనుందని, ఇది భారతదేశపు మొట్టమొదటి పూర్తిగా డిజిటల్ జనగణన కానుంది. స్వయం-గణన సదుపాయం ద్వారా, కుటుంబాలు ఒక సరళమైన, సౌకర్యవంతమైన, వినియోగదారులకు సులభంగా అర్థమయ్యే ప్రక్రియ ద్వారా తమ వివరాలను డిజిటల్‌గా నమోదు చేసుకోవచ్చు. గృహాల జాబితా తయారీ ప్రక్రియ కూడా డిజిటల్‌గానే నిర్వహించబడుతుందని తెలియజేశారు.