మీర్‌పేట్‌లో భారీ అగ్నిప్రమాదం

మీర్‌పేట్: హైదరాబాద్‌లోని మీర్‌పేట్ పోలీస్ స్టేషన్(Meerpet Police Station) పరిధిలో ఉన్న నందనవనంలోని ఒక ప్లాస్టిక్ గోదాములో మంగళవారం రాత్రి భారీ అగ్నిప్రమాదం సంభవించింది. మంటలు వేగంగా వ్యాపించడంతో స్థానికులు భయాందోళనకు గురయ్యారు. స్థానికులు వెంటనే పోలీసులకు, అగ్నిమాపక శాఖకు సమాచారం అందించారు. 

అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. మంటలను అదుపులోకి తెచ్చేందుకు మూడు అగ్నిమాపక వాహనాలను రంగంలోకి దించారు. గోదాములో భారీ పరిమాణంలో ప్లాస్టిక్ సామాగ్రి నిల్వ ఉండటంతో జరిగిన అగ్నిప్రమాదం వల్ల భారీ ఆస్తి నష్టం వాటిల్లింది. అయితే, ఎలాంటి ప్రాణనష్టం జరగలేదు. అగ్నిప్రమాదానికి గల కచ్చితమైన కారణంపై దర్యాప్తు జరుగుతోంది.