కోదాడ మున్సిపాలిటీ ఎకౌంట్స్‌ సెక్షన్లో ఖాళీ కుర్చీల దర్శనం!

ఉదయం 11 గంటలకే సిబ్బంది జాడేది?

ప్రజల సమస్యలు పట్టించుకునేదెవరు

కోదాడ సెప్టెంబర్ 03,(విజయక్రాంతి) ప్రభుత్వ కార్యాలయాల్లో సిబ్బంది సమయపాలన, ప్రజలకు అందుబాటులో ఉండాల్సిన బాధ్యతపై మరోసారి ప్రశ్నలు తలెత్తుతున్నాయి. కోదాడ మున్సిపాలిటీ ఎకౌంట్స్‌ సెక్షన్లో(Kodad Municipality Accounts Section) ఉదయం 11 గంటల సమయంలోనూ పలు కుర్చీలు ఖాళీగా దర్శనమివ్వడం చర్చనీయాంశంగా మారింది. ప్రజలు తమ పనుల కోసం కార్యాలయాలకు వస్తుంటే.. సంబంధిత అధికారులు, సిబ్బంది అందుబాటులో లేకపోవడంతో ఇబ్బందులు ఎదురవుతున్న పరిస్థితి కనిపిస్తోంది.

ప్రభుత్వ కార్యాలయం(Government office) అంటే ప్రజలకు సేవలందించే కేంద్రం కావాలి.. ఖాళీ కుర్చీలకు నిలయంగా మారకూడదు అంటూ పలువురు అసంతృప్తి వ్యక్తం చేస్తున్నారు. ఉద్యోగులు నిర్ణీత సమయానికి విధులకు హాజరై ప్రజలకు సేవలందించాల్సి ఉండగా.. కార్యాలయ సమయాల్లోనే కుర్చీలు ఖాళీగా కనిపించడంపై ఉన్నతాధికారులు దృష్టి సారించాల్సిన అవసరం ఉంది. ముఖ్యంగా వివిధ పనుల కోసం దూర ప్రాంతాల నుంచి వచ్చే ప్రజలు సిబ్బంది కోసం వేచి చూడాల్సిన పరిస్థితి ఏర్పడితే వారి సమయం, శ్రమ వృథా అవుతున్నాయి.

ఉదయం 11 గంటలకే ఈ పరిస్థితి ఉంటే.. కార్యాలయ పనితీరు ఎలా ఉందన్న ప్రశ్నలు సహజంగానే తలెత్తుతున్నాయి. సిబ్బంది హాజరు, విధుల నిర్వహణ, కార్యాలయ సమయపాలనపై ఉన్నతాధికారులు ఆకస్మిక తనిఖీలు నిర్వహించి వాస్తవ పరిస్థితిని పరిశీలించాలని ప్రజలు కోరుతున్నారు. ప్రభుత్వ కార్యాలయాల్లో ‘ప్రజలే ప్రభువులు’ అనే నినాదం మాటల్లో కాకుండా ఆచరణలో కనిపించాలంటే.. అధికారులు, సిబ్బంది బాధ్యతాయుతంగా విధులు నిర్వర్తించాల్సిందే. ఖాళీ కుర్చీలకు బదులు ప్రజలకు అందుబాటులో ఉండే సిబ్బంది కనిపించేలా చర్యలు తీసుకోవాలని స్థానికులు కోరుతున్నారు.