ఆంజనేయులు గౌడ్‌కు ఎమ్మెల్యే సునీత లక్ష్మారెడ్డిని విమర్శించే స్థాయి లేదు

డీసీఎంఎస్‌ ఉపాధ్యక్షుడు అరిగే రమేష్‌

కొల్చారం: డీసీసీ అధ్యక్షుడు ఆంజనేయులు గౌడ్‌కు నర్సాపూర్‌ ఎమ్మెల్యే సునీత లక్ష్మారెడ్డిని విమర్శించే స్థాయి లేదని డీసీఎంఎస్‌ ఉపాధ్యక్షుడు అరిగే రమేష్‌ అన్నారు. బుధవారం కొల్చారం మండల కేంద్రంలో నిర్వహించిన బీఆర్‌ఎస్‌ పార్టీ కార్యకర్తల విస్తృతస్థాయి సమావేశంలో ఆయన మాట్లాడారు. ఆంజనేయులు గౌడ్‌ రాజకీయాలను అడ్డుపెట్టుకుని అక్రమ సంపాదనే ధ్యేయంగా పనిచేస్తున్నారని రమేష్‌ ఆరోపించారు. తాను గత 20 ఏళ్లుగా సర్పంచ్‌, ఎంపీపీ, జెడ్పీటీసీ సభ్యుడు, ఆప్కో డైరెక్టర్‌, డీసీఎంఎస్‌ ఉపాధ్యక్షుడిగా ఉమ్మడి జిల్లా రాజకీయాల్లో కొనసాగుతున్నానని తెలిపారు.

రాజకీయాల్లో కొనసాగేందుకు తాము ఆస్తులు అమ్ముకుంటున్నామని, అయితే కొందరు రాజకీయాలను అడ్డుపెట్టుకుని ఆస్తులు కూడబెట్టుకుంటున్నారని విమర్శించారు. నర్సాపూర్‌ నియోజకవర్గ అభివృద్ధికి ఆంజనేయులు గౌడ్‌ చేసిందేమీ లేదని రమేష్‌ ఆరోపించారు. నియోజకవర్గ అభివృద్ధిపై బహిరంగ చర్చకు తాను సిద్ధంగా ఉన్నానని ప్రకటించారు. ఎమ్మెల్యే సునీత లక్ష్మారెడ్డి నాయకత్వంలో నియోజకవర్గ అభివృద్ధి కోసం బీఆర్‌ఎస్‌ శ్రేణులు కృషి చేస్తున్నాయని ఆయన పేర్కొన్నారు. కాగా, రాజకీయ విమర్శలు, ఆరోపణలు ఆయా నాయకుల అభిప్రాయాలేనని స్పష్టం చేస్తూ, సంబంధిత వ్యక్తుల స్పందన ఉంటే ప్రచురణకు అవకాశం ఉంటుంది.