రాజకీయ మహాశక్తిగా బీజేపీ!

మే 26తో బీజేపీ అధికారంలోకి వచ్చి 12 సంవత్సరాలు పూర్తిచేసుకుంది. 

* పుష్కర కాలంలో.. అత్యంత కీలకమైన, అగ్రగామి రాజకీయ శక్తిగా బీజేపీ ఎదిగింది. ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా నాయకత్వంలో.. అప్పటివరకు కొన్ని ప్రాంతాలకే పరిమితమైన ఈ పార్టీ, లోక్‌సభ ఎన్నికలతో పాటు అనేక రాష్ట్రాల అసెంబ్లీ ఎన్నికల్లోనూ విజయాలు సాధిస్తూ దేశవ్యాప్తంగా సంచలనం సృష్టించింది. దేశ రాజకీయ ముఖచిత్రాన్ని వ్యవస్థాగతంగా బీజేపీ మార్చివేసింది. ఇది కొత్త చరిత్ర. నడు స్తున్న చరిత్ర.

* 2014 లోక్‌సభ ఎన్నికల్లో బీజేపీ 31.34 శాతం ఓట్లతో 282 స్థానాలను కైవసం చేసుకుంది. 2019 నాటికి ఇది మరింతగా పెరిగి 37.46 ఓట్ల శాతంతో 303 స్థానాలకు చేరుకుంది. ఇక 2024 ఎన్నికల్లో బీజేపీ స్థానాలు 240కి తగ్గినప్పటికీ, ఎన్డీయే కూటమి 293 స్థానాలతో స్పష్టమైన ఆధిక్యతను ప్రదర్శించి మోదీ మూడోసారి ప్రధానిగా బాధ్యతలు చేపట్టేలా చేసింది. రాష్ట్రాల స్థాయిలోనూ పార్టీ విజయపరంపర సాగించింది.

2014లో బీజేపీ దాని మిత్రపక్షాలు కేవలం 7 రాష్ట్రాల్లో మాత్రమే అధికారంలో ఉండేవి. ఇది భారతదేశ వైశాల్యంలో 34 శాతం, జనాభాలో 25 శాతంగా ఉండేది. కానీ మే 2026 నాటికి, ఎన్డీయే పాలన కింద ఉన్న ప్రాం తాలు ఏకంగా 22 రాష్ట్రాలు, కేంద్రపాలిత ప్రాంతాలకు విస్తరించాయి. ఇందులో 14 రాష్ట్రాలలో బీజేపీ నేరుగా అధికారంలో ఉంది. ప్రస్తుతం ఇది దేశ భౌగోళిక వైశాల్యంలో 72--76 శాతాన్ని, జనాభాలో 78 శాతం ఉండటం గమనార్హం.

* మోదీ, అమిత్ షా వ్యూహం పక్కా ప్రణాళికతో సాగుతుంది. సందర్భోచిత పొత్తులు వారి ప్రత్యేకత. 2014 ఆరంభం నుంచే వారు యూపీఏ ప్రభుత్వ బలహీన తలను లక్ష్యంగా చేసుకొని అప్రతిహతంగా విజయపధంలో సాగుతున్నారు. మోదీ ఆకర్షణీయమైన ప్రజా నాయకుడిగా, అమి త్ షా పార్టీకి వెన్నెముకగా నిలస్తున్నారు.

 మోదీ, షా వ్యూహం.. కమల వికాసం! 

పక్కా ప్రణాళిక, సరికొత్త ప్రచారాస్త్రాలు, సందర్భోచిత పొత్తులు

1. క్షేత్రస్థాయిలో బలమైన, క్రమశిక్షణతో కూడిన యంత్రాంగ నిర్మాణం
2. ఉపాధి, సంక్షేమం, అభివృద్ధికి పెద్ద పీట 
3. ప్రధానాంశాలుగా జాతీయవాదం, హిందుత్వం, ఆర్థిక సంస్కరణలు 
4. పుష్కర కాలంలో విప్లవాత్మకమైన మార్పులు 
5. దేశంలోని ప్రతి మూలకూ విస్తరించిన కమలం పార్టీ 
6.   7 నుంచి 22 రాష్ట్రాలు, కేంద్రపాలిత ప్రాంతాలకు పెరిగిన ఎన్డీయే ప్రాభవం

నరేంద్రమోదీ ప్రధానమంత్రిగా మొట్టమొదట ప్రమాణ స్వీకారం చేసి సరిగ్గా పుష్కర కాలం గడిచింది. మే 26, 2014న నరేంద్రమోదీ ప్రధానమంత్రిగా ప్రమాణ స్వీకారం చేయడంతో ప్రారంభమైన బీజేపీ నేతృత్వంలోని ఎన్డీయే ప్రభుత్వం.. నిన్నటి (మే 26, మంగళవారం)తో అధికారంలోకి వచ్చి 12 సంవత్సరాలు పూర్తి చేసుకుంది. ఈ పుష్కర కాలంలో భారత రాజకీయం విప్లవాత్మక మార్పునకు లోనైంది.

నాటి కాంగ్రెస్ నేతృత్వంలోని యూపీఏ ప్రభుత్వానికి వ్యతిరేకంగా వచ్చిన స్పష్టమైన తీర్పుతో మొదలైన బీజేపీ ప్రస్థానం.. నేడు దేశంలోనే అత్యంత కీలకమైన, అగ్రగామి రాజకీయ శక్తిగా కమలం పార్టీని నిలబెట్టింది. అప్పటి వరకు కొన్ని ప్రాంతాలకే పరిమితమైన బీజేపీ.. ప్రధానమంత్రి మోదీ, కేంద్ర హోంమంత్రి అమిత్ షాల నాయకత్వంలో లోక్‌సభతో పాటు అనేక రాష్ట్రాల అసెంబ్లీ ఎన్నికల్లోనూ ఘన విజయాలు సాధిస్తూ దేశవ్యాప్త మహాశక్తిగా ఎదిగింది. తద్వారా దేశ రాజకీయ ముఖచిత్రాన్ని వ్యవస్థాగతంగా  మార్చివేసింది.

సొంతంగా స్పష్టమైన మెజార్టీ 

2014 లోక్‌సభ ఎన్నికల్లో బీజేపీ 31.34 శాతం ఓట్లతో 282 స్థానాలను కైవసం చేసుకుంది. తద్వారా మూడు దశాబ్దాల తర్వాత దేశంలో ఒకే ఒక పార్టీ సొంతంగా స్పష్టమైన మెజారిటీని సాధించినట్లయ్యింది. 2019 నాటికి ఇది మరింతగా పెరిగి 37.46 ఓట్ల శాతంతో 303 స్థానాలకు చేరుకుంది. ఇక 2024 ఎన్నికల్లో బీజేపీ స్థానాలు 240కి తగ్గినప్పటికీ, ఎన్డీయే కూటమి 293 సీట్లతో స్పష్టమైన ఆధిక్యతను ప్రదర్శించి మోదీ మూడోసారి ప్రధానిగా బాధ్యతలు చేపట్టేలా చేసింది. రాష్ట్రాల స్థాయిలోనూ పార్టీ సాధించిన వృద్ధి అంతే ఆశ్చర్యకరంగా ఉంది.

2014లో బీజేపీ దాని మిత్రపక్షాలు కేవలం 7 రాష్ట్రాల్లో మాత్రమే అధికారంలో ఉండేవి. ఇది భారతదేశ వైశాల్యంలో 34 శాతం, జనాభాలో 25 శాతంగా ఉండేది. కానీ, మే 2026 నాటికి, ఎన్డీయే పాలన కింద ఉన్న ప్రాంతాలు ఏకంగా 22 రాష్ట్రాలు, కేంద్రపాలిత ప్రాంతాలకు విస్తరించాయి. ఇందులో 14 రాష్ట్రాలలో బీజేపీ నేరుగా అధికారంలో ఉంది. ప్రస్తుతం ఇది దేశ భౌగోళిక వైశాల్యంలో 72 శాతాన్ని, జనాభాలో 78 శాతం ఉండటం గమనార్హం.

ఆరంభం నుంచే యూపీఏ బలహీనతలు లక్ష్యంగా.. 

మోదీ, అమిత్ షా.. ఈ ఇద్దరు నేతల వ్యూహం ప్రధానంగా పక్కా ప్రణాళిక, సరికొత్త ప్రచారాస్త్రాలు, దృఢమైన పార్టీ సంస్థాగత నిర్మాణం, సందర్భోచిత పొత్తులపై ఆధారపడి సాగుతుంటాయి. 2014 ఆరంభం నుంచే మోదీ, షా ద్వయం యూపీఏ ప్రభుత్వ బలహీనతలను లక్ష్యంగా చేసుకుంది. 2 స్పెక్ట్రమ్ కేటాయింపులు, కోల్గేట్ (బొగ్గు కుంభకోణం) వంటి భారీ అవినీతి స్కాం లను ఎత్తిచూపుతూ.. కాంగ్రెస్‌కు పాలన చేతకానితనంతో, దాదాపు 12 లక్షల కోట్ల రూపాయల అవినీతి కూపంలో మునిగిపోయిందనే అంశాన్ని ప్రజల్లోకి బలంగా తీసుకెళ్లారు.

ఈ ఎన్నికల ప్రచారంలో కాంగ్రెస్ ప్రభుత్వాన్ని ‘మా- బేటా కా సర్కార్’ (తల్లీ, కొడుకుల ప్రభుత్వం)గా అభివర్ణిస్తూ, గాంధీ కుటుంబ వారసత్వ రాజకీయాలపై నేరుగా దాడి చేశారు. రాహుల్‌గాంధీకి ప్రజల కష్టాలతో సంబంధం లేదని చిత్రించారు. ఈ అవినీతి వ్యతిరేక నినాదంతో పాటు సుపరిపాలన, అభివృద్ధి హామీలు ప్రజల్లో ఉన్న తీవ్ర అసంతృప్తిని క్యాష్ చేసుకుని, వారి మద్దతును చూరగొన్నారు.

మోదీ ప్రసంగ శైలి ప్రజల ఆకాంక్షలను, సాంస్కృతిక అస్తిత్వాన్ని మేళవించి శక్తివంతమైన భావజాలాన్ని ప్రజల్లోకి తీసుకెళ్లింది. జాతీయవాదం, హిందుత్వం, ఆర్థిక సంస్కరణలు ప్రధానాంశాలుగా నిలిచాయి. స్విస్ బ్యాంకుల్లో మూలుగుతున్న నల్లధనాన్ని వెనక్కి రప్పిస్తామని, ప్రతి పౌరుడి ఖాతాలో రూ.15 లక్షల చొప్పున ప్రయోజనం చేకూరుస్తామని హామీ ఇచ్చారు. ఏటా రెండు కోట్ల ఉద్యోగాల కల్పన వంటి వాగ్దానాలతో ఉపాధి రంగానికి పెద్దపీట వేశారు.

’మేక్ ఇన్ ఇండియా’ వంటి వినూత్న కార్యక్రమాల ద్వారా ఉత్పాదక రంగాన్ని బలోపేతం చేయాలని ఆకాంక్షించారు. అయోధ్యలో రామాలయ ఉద్యమం సమాప్తమై.. ఆలయ నిర్మాణంతో ఒక బలమైన సాంస్కృతిక చిహ్నంగా మారి, మెజారిటీ ప్రజల సెంటిమెంట్‌ను బలపరిచింది. అదే సమయంలో అభివృద్ధి నినాదం సమాజంలోని ఇతర వర్గాలను ఆకట్టుకుంది. సోషల్ మీడియా, భారీ బహిరంగ సభలు, అత్యంత క్రమశిక్షణ కలిగిన కేడర్‌ను ఉపయోగించుకుని విస్తృత ప్రచారాల ద్వారా ఈ సందేశాలను ప్రజల్లోకి బలంగా తీసుకెళ్లారు.

పెరిగిన బీజీపీ ప్రాభల్యం

ఉత్తరప్రదేశ్‌లో కులాలకతీతంగా సంక్షేమ పథకాలను అమలు చేస్తూ, భారీ సంస్థాగత విస్తరణ ద్వారా సమాజ్‌వాదీ పార్టీ (ఎస్‌పీ), బహుజన్ సమాజ్ పార్టీ (బీఎస్‌పీ)ల ఆధిపత్యాన్ని బీజేపీ బద్దలు కొట్టింది. దీనివల్ల బీఎస్పీ ప్రభావం క్రమంగా తగ్గిపోయింది. బీహార్‌లో నితీష్‌కుమార్ నేతృత్వంలోని జేడీ (యూ)తో పొత్తులు మారుతున్న పరిస్థితులకు అనుగుణంగా సాగాయి. క్రమంగా బీజేపీ తన పట్టును పెంచుకుంటూ ప్రాంతీయ పార్టీల ప్రభావాన్ని తగ్గించగలిగింది. మహారాష్ట్ర రాజకీయాల్లో ఊహించని నాటకీయ పరిణామాలు చోటుచేసుకున్నాయి.

శివసేనలో చీలిక తెచ్చి, ఒక వర్గాన్ని ఎన్డీయే కూటమి వైపు తిప్పుకోవడంలో బీజేపీ విజయం సాధించింది. ఈ వ్యూహం రాష్ట్రంలో సుదీర్ఘకాలంగా ఉన్న ఒక ప్రాంతీయ శక్తిని బలహీనపరిచి.. తద్వారా బీజేపీ తన స్థానాన్ని మరింత బలోపేతం చేసుకుంది. ఇలాంటి పరిణామాలే ఎన్సీపీలోనూ జరిగాయి. ఈశాన్య రాష్ట్రాల్లో వ్యూహాత్మక పొత్తులు, అభివృద్ధిపై ప్రత్యేక దృష్టి పెట్టడం ద్వారా అక్కడి సంప్రదాయ ప్రాంతీయ పార్టీల పట్టును సడలించగలిగింది.

తమిళనాడులో డీఎంకె, అన్నాడీఎంకె ల ద్రావిడ ఆధిపత్యానికి సవాలు విసురుతూ.. నిరంతర సంస్థాగత కృషి, పొత్తుల ద్వారా 2026 నాటికి వారి ప్రాభవాన్ని తగ్గించడంలో బీజేపీ విజయవంతమైంది. పశ్చిమ బెంగాల్లో అత్యంత ఆశ్చర్యకరమైన మార్పులు కనిపించాయి. తృణమూల్ కాంగ్రెస్ (టీఎంసీ) ప్రభుత్వానికి వ్యతిరేకంగా పరిపాలనా లోపాలు, యాంటీ- ఇన్‌కంబెన్సీ (ప్రభుత్వ వ్యతిరేకత), సాంస్కృతిక అంశాలను అస్త్రాలుగా చేసుకుని బీజేపీ నిరంతరం పోరాడింది. ఇది ఇటీవలి ఎన్నికల్లో బీజేపీకి భారీ స్థానాలను తెచ్చిపెట్టడమే కాకుండా, మమతా బెనర్జీ పట్టును గణనీయంగా తగ్గించింది.

పరిస్థితులకు అనుగుణంగా.. 

కొత్త ప్రాంతాల్లోకి ప్రవేశించేటప్పుడు స్థానిక పరిస్థితులకు అనుగుణంగా ప్రచారాలు రూపొందించడం, ప్రభావవంతమైన స్థానిక నాయకులను చేర్చుకోవడం, క్షేత్రస్థాయిలో గుర్తింపు కోసం కేంద్ర ప్రభుత్వ పథకాలను విస్తృతంగా ఉపయోగించుకోవడం వంటి వ్యూహాలను పార్టీ అవలంబించింది. డైరెక్ట్ బెనిఫిట్ ట్రాన్స్ఫర్ (నగదు బదిలీ), ఆయుష్మాన్ భారత్ హెల్త్ ఇన్సూరెన్స్, పీఎం ఆవాస్ యోజన ఇళ్లు, ఉచిత రేషన్ బియ్యం వంటి సంక్షేమ కార్యక్రమాలు మహిళలు, రైతులు, పేద వర్గాలలో పార్టీ పట్ల నమ్మకాన్ని పెంచాయి. ఈ కార్యక్రమాలు భావజాల ప్రచారానికి తోడుగా, పరిపాలనా పరమైన నిబద్ధతను చాటిచెప్పే ప్రత్యక్ష సాక్ష్యాలుగా నిలిచాయి. 

వ్యూహాత్మక చతురత, కచ్చితత్వంతో కూడిన ప్రణాళిక

మోదీ, షా.. ద్వయం రాజకీయ చాతుర్యం.. కచ్చితత్వంతో కూడిన దీర్ఘకాలిక ప్రణాళికలతో ఉంది. మోదీ ఆకర్షణీయమైన ప్రజా నాయకుడిగా, అంతర్జాతీయ వేదికపై భారతదేశ ఎదుగుదలను చాటిచెప్పే దార్శనికుడిగా నిలిచారు. షా.. పార్టీకి వెన్నుము కగా ఉంటూ వ్యూహాత్మక చతురతను అందించారు. వీరిద్దరూ కలిసి.. యూపీఏపై ఉన్న ప్రభుత్వ వ్యతిరేకతను, ఎన్డీయే పట్ల సానుకూలతగా మార్చగలిగారు.

రామాలయ నిర్మాణం, ఆర్టికల్ 370 రద్దు, మౌలిక వసతుల కల్పన వంటి కీలక హామీలను నెరవేర్చడంతో ఇది సాధ్యమైంది. కాలక్రమేణా వీరి ప్రచార అస్త్రాలు 2014 నాటి అవినీతి వ్యతిరేకత, అభివృద్ధి నుండి.. ఆ తర్వాత కాలంలో ఆత్మనిర్భర్ భారత్ (స్వయం సమృద్ధి), సాంస్కృతిక పునరుజ్జీవనం, బలమైన నాయకత్వం వైపుగా రూపాంతరం చెందాయి.

బీజేపీ స్థూల విధానాల వైపే జనం

నిరుద్యోగ సమస్యలు, అసమాన ఆర్థిక ఫలితాల వంటి సవాళ్లు ఉన్నాయని విమర్శకులు వేలెత్తి చూపుతున్నప్పటికీ.. ఎన్నికల రికార్డులు మాత్రం దేశ ప్రజలు వారి స్థూల విధానాల వైపే ఉన్నారని స్పష్టం చేస్తున్నాయి. బీజేపీ సభ్యత్వం, కేడర్ బలం ప్రస్తుతం ప్రత్యర్థి పార్టీల కంటే ఎంతో ఎక్కువగా ఉంది, ఇది ప్రతిపక్షాలపై నిరంతరం ఒత్తిడి తీసుకురావడానికి సహాయపడు తుంది. ఒకప్పుడు కూటమి ప్రభుత్వాల కాలంలో చక్రం తిప్పిన ప్రాంతీయ పార్టీలు నేడు అప్రధాన్యంగా మారిపోయాయి. ఉనికి కోసం రక్షణాత్మక ధోరణిలోకి వెళ్లడం లేదా బీజేపీ షరతులకు లొంగి పొత్తులు పెట్టుకోవాల్సిన పరిస్థితి ఏర్పడింది.

భారత రాజకీయాల్లో మైలురాయి

పుష్కర కాలం.. పన్నెండేళ్లు గడిచినా మోదీ, -షా భాగస్వామ్యం భారత రాజకీయాన్ని సరికొత్తగా నిర్వచిస్తూనే ఉంది. కేవలం కొన్ని ప్రాంతాల్లోనే ప్రభావం ఉన్న స్థాయి నుండి.. దేశంలోని ప్రతి మూలకు వేళ్ళూనుకున్న ఒక జాతీయ మహాశక్తిగా బీజేపీ ఎదిగింది. వారి వ్యూహరచన పటిష్టంగా ఉండటంతోపాటు.. కఠోర సంస్థాగత శ్రమ, సంక్షేమ పథకాల అమలు, వ్యూహాత్మక అవకాశవాదంతో కూడిన వారి ప్రణాళిక ఇంకా కొనసాగుతూనే ఉంది. భారతదేశ రాజకీయాల్లో ఇదొక మైలురాయిగా నిలిచిన వేళ.. ఈ మార్పు అంతా ఒక స్పష్టమైన రాజకీయ బ్లూప్రింట్‌ను క్రమశిక్షణతో అమలు చేయడం ద్వారానే సాధ్యమైందని రుజువవుతోంది.

బూత్ స్థాయి మేనేజ్‌మెంట్‌కు ప్రాధాన్యం

ఈ విజయాల్లో అమిత్ షా సంస్థాగత నైపుణ్యం అత్యంత కీలక పాత్ర పోషించింది. 2014 నుంచి 2020 వరకు బీజేపీ అధ్యక్షుడిగా, ఆ తర్వాత కీలక మంత్రిగా బాధ్యతలు నిర్వర్తిస్తున్న అమిత్ షా.. బూత్ స్థాయి మేనేజ్‌మెంట్‌కు ప్రాధాన్యతనిస్తూ ఒక బలమైన యంత్రాంగాన్ని నిర్మించారు. ‘మేరా బూత్ సబ్సే మజ్బూత్’ (నా బూత్ అత్యంత శక్తివంతమైనది) అనే మంత్రంతో స్థానిక యూనిట్లను బలోపేతం చేశారు. సభ్యత్వాల నమోదు కార్యక్రమం ద్వారా పార్టీ సభ్యుల సంఖ్యను 11 కోట్లకు పైగా పెంచారు. డేటా ఆధారితంగా సూక్ష్మస్థాయిలో -మేనేజ్‌మెంట్‌కు ప్రాధాన్యతనిచ్చారు.

షా దేశవ్యాప్తంగా విస్తృతంగా పర్యటిస్తూ జిల్లా కార్యాలయాలను సందర్శించడం, క్రమం తప్పకుండా సమావేశాలు నిర్వహించడం, భావజాల శిక్షణ ఇవ్వడం వంటివి చేశారు. ఈ క్షేత్రస్థాయి వ్యూహం సరైన ఓటర్లను లక్ష్యంగా చేసుకోవడానికి, పొత్తుల చర్చలకు, ఓటింగ్ శాతాన్ని గరిష్టంగా పెంచడానికి దోహదపడింది. ప్రాంతీయ పార్టీలను బలహీనపరిచే వ్యూహంలో భావజాల వ్యాప్తి, పొత్తుల చాణక్యం, అంతర్గత విభేదాలను సృష్టించడం, నేరుగా పోటీ పడటం వంటి అంశాలు ఉన్నాయి. 

ఎన్నికల నిర్వహణలో సరికొత్త సాంకేతికత 

మోదీ, షాల ఆధ్వర్యంలో ఎన్నికల నిర్వహణ సరికొత్త సాంకేతిక శిఖరాలను తాకింది. ఓటర్ల డేటాబేస్, టార్గెటెడ్ మెసేజింగ్ (నిర్దిష్ట వర్గాలను లక్ష్యంగా చేసుకోవడం), రియల్ టైమ్ మానిటరింగ్ కోసం ప్రచారంలో టెక్నాలజీని విరివిగా ఉపయోగించారు. భారీ రోడ్ షోలు, ప్రారంభ రోజుల్లో నిర్వహించిన హోలోగ్రామ్ ప్రసంగాలు, నిరంతర బూత్ స్థాయి కదలికలు తమ పక్కా ఓటర్లు పోలింగ్ బూత్‌లకు వచ్చేలా చేశాయి. వీరి పొత్తులు ఎప్పుడూ ఆచరణాత్మకంగా ఉండేవి.

అవసరమైన చోట ప్రాంతీయ పార్టీలను ఎన్డీయే చేర్చుకు న్నప్పటికీ, బీజేపీని పెద్దన్న పాత్రలోనే ఉంచింది. ఈ విధమైన సరళత బీహార్, మహారాష్ట్ర వంటి రాష్ట్రాల్లో బాగా ఉపయోగపడగా, మిగిలిన చోట్ల సొంత బలాన్ని నిర్మించుకోవడానికి తోడ్పడింది. 2014 నుండి బీజేపీ తీవ్రంగా పోటీ పడిన మెజారిటీ లోక్‌సభ, అసెంబ్లీ ఎన్నికల్లో విజయం సాధించింది.

కొన్ని రాష్ట్రాల ఎన్నికల్లో ప్రభుత్వ వ్యతిరేకత వల్ల ఓటములు ఎదురైనప్పటికీ, వెనువెంటనే వ్యూహాలను సరిదిద్దుకోవడం ద్వారా చాలా వేగంగా కో లుకుంది. పుల్వామా, బాలాకోట్ ఘటనల తర్వాత జాతీ య భద్రత అంశాల చుట్టూ తిరిగిన ప్రచారం 2019 విజయానికి బాటలు వేసింది. ఇది పార్టీ వ్యూహాత్మకంగా ఎం త వేగంగా మారగలదో నిరూపించింది. 2024 ఫలితాల్లో సొంతంగా మెజారిటీ రాకపోయినప్పటికీ, ఎన్డీయే కూట మి అధికారాన్ని నిలబెట్టుకోవడం పార్టీ పట్టుకు నిదర్శనం.

సీఎల్ రాజం

చైర్మన్, విజయక్రాంతి