28 August, 2026 | 4:38 PM 
మదర్ థెరిసా పొదుపు సమితిపై ఆరోపణల కలకలం
మహిళల పొదుపు సొమ్ముకు లెక్కలేవంటూ సభ్యుల ఆవేదన
అధిక వడ్డీలు, వడ్డీపై వడ్డీ వసూళ్లపై విచారణ జరపాలని డిమాండ్
కలెక్టర్ జోక్యం చేసుకుని సమగ్ర దర్యాప్తు చేపట్టాలని నామని హరికృష్ణ విజ్ఞప్తి
మంథని, ఆగస్టు 28 (విజయక్రాంతి): మహిళల ఆర్థిక స్వావలంబన, పొదుపు లక్ష్యంగా ఏర్పాటైన మదర్ థెరిసా మహిళా పొదుపు సమితిపై పలు ఆరోపణలు వెల్లువెత్తుతున్నాయి. సభ్యుల పొదుపు సొమ్ము, రుణాల పంపిణీ, వడ్డీ వసూళ్లు, ఖాతాల నిర్వహణలో పారదర్శకత లేదంటూ కొందరు సభ్యులు ఆవేదన వ్యక్తం చేస్తున్నారు. ఈ వ్యవహారంపై సమగ్ర విచారణ జరిపి వాస్తవాలను వెలికితీయాలని వారు డిమాండ్ చేస్తున్నారు. మంథని పట్టణంలోని లైన్గడ్డ సమీపంలో కొనసాగుతున్న ఈ సమితి 2002 నుంచి కార్యకలాపాలు నిర్వహిస్తున్నట్లు ఫిర్యాదుదారులు పేర్కొంటున్నారు. అప్పటి నుంచి ఇప్పటి వరకు సభ్యుల నుంచి ఎంత పొదుపు సొమ్ము సేకరించారు, ఎంత మొత్తాన్ని రుణాలుగా అందించారు, ఎంత వడ్డీ వసూలు చేశారు, ప్రస్తుతం సమితి వద్ద ఎంత నిధి ఉందనే అంశాలపై పూర్తి వివరాలు వెల్లడించాలని వారు కోరుతున్నారు.
వడ్డీపై వడ్డీ వసూళ్ల ఆరోపణలు
సమితి ద్వారా తీసుకున్న రుణాలపై అధిక వడ్డీలు వసూలు చేస్తున్నారని, కొన్నిసార్లు వడ్డీపై కూడా వడ్డీ విధిస్తున్నారని కొందరు సభ్యులు ఆరోపిస్తున్నారు. దీంతో మహిళలు ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేస్తున్నారు. అయితే ఈ ఆరోపణల్లో వాస్తవం ఎంతన్నది అధికారిక విచారణలోనే తేలాల్సి ఉంది.
లెక్కలు అడిగితే సమాధానం లేదంటూ ఆరోపణలు
తమ పేర్లపై ఉన్న పొదుపు మొత్తం, రుణం, చెల్లించిన వడ్డీ, బకాయిల వివరాలు అడిగినా సరైన సమాచారం ఇవ్వడం లేదని కొందరు మహిళలు ఆరోపిస్తున్నారు. ముందుగా బకాయిలు చెల్లించాలని, ఆ తర్వాత లెక్కలు చెబుతామని సమాధానం ఇస్తున్నారని వారు వాపోతున్నారు.
లెక్కలపై ప్రశ్నించిన కొందరు మహిళలను సమితి నుంచి తొలగించారనే ఆరోపణలు కూడా వినిపిస్తున్నాయి. ఈ ఆరోపణలపై సమితి నిర్వాహకుల నుంచి అధికారిక వివరణ రావాల్సి ఉంది.
సమగ్ర ఆడిట్కు డిమాండ్
సమితి ప్రారంభమైన నాటి నుంచి ఇప్పటి వరకు జరిగిన అన్ని ఆర్థిక లావాదేవీలపై సమగ్ర ఆడిట్ నిర్వహించాలని ఫిర్యాదుదారులు కోరుతున్నారు. సభ్యుల పొదుపు ఖాతాలు, రుణ రిజిస్టర్లు, వడ్డీ వివరాలు, రసీదులు, బ్యాంకు లావాదేవీలు, ఖాతా పుస్తకాలు తదితర రికార్డులను క్షుణ్ణంగా పరిశీలించాలని డిమాండ్ చేస్తున్నారు. ప్రతి నెలా సమితిలో జరిగే ఆదాయ–వ్యయాలు, రుణాల పంపిణీ, వడ్డీ వసూళ్లు, సభ్యుల పొదుపు వివరాలను సభ్యులందరి ముందు పారదర్శకంగా ఉంచేలా చర్యలు తీసుకోవాలని కోరుతున్నారు.
చైర్మన్ వ్యవహారాలపై విచారణ జరపాలి...!
మదర్ థెరిసా మహిళా పొదుపు సమితి చైర్మన్ వ్యవహారాలతో పాటు సమితి నిర్వహణపై పూర్తిస్థాయి విచారణ జరపాలని మంథని నాలుగో వార్డు గంగాపురికి చెందిన నామని హరికృష్ణ డిమాండ్ చేశారు. సమితి ప్రారంభమైనప్పటి నుంచి ఇప్పటి వరకు జరిగిన ప్రతి ఆర్థిక లావాదేవీని అధికారులు పరిశీలించాలని ఆయన కోరారు. మహిళల కష్టార్జిత పొదుపు సొమ్ముకు పూర్తి లెక్కలు చెప్పాలని, ప్రతి నెలా ఆర్థిక లావాదేవీల వివరాలను సభ్యుల సమావేశంలో వెల్లడించే విధంగా చర్యలు తీసుకోవాలని విజ్ఞప్తి చేశారు.
మహిళల పొదుపు సొమ్ము విషయంలో ఎలాంటి అనుమానాలకు తావులేకుండా పూర్తి పారదర్శకత ఉండాలి. కలెక్టర్ చొరవ తీసుకుని సమగ్ర విచారణ జరిపించి వాస్తవాలను ప్రజల ముందుకు తీసుకురావాలి. మహిళలకు న్యాయం జరిగేలా చర్యలు తీసుకోవాలి” అని నామని హరికృష్ణ కోరారు. ఈ వ్యవహారంపై సంబంధిత అధికారులు స్పందించి సమితి రికార్డులు, ఫిర్యాదులు, ఆర్థిక లావాదేవీలను పరిశీలించి నిజానిజాలను తేల్చాలని సభ్యులు డిమాండ్ చేస్తున్నారు. మదర్ థెరిసా మహిళా పొదుపు సమితిపై వస్తున్న ఆరోపణలు నిజమా కాదా అన్నది అధికారిక విచారణలోనే తేలాల్సి ఉంది.
