రాబోయే నాలుగు రోజుల పాటు తెలంగాణకు వర్ష హెచ్చరిక

హైదరాబాద్: తెలంగాణ రాష్ట్రవ్యాప్తంగా రాబోయే నాలుగు రోజుల పాటు అక్కడక్కడా తేలికపాటి నుండి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉందని వాతావరణ శాఖ అంచనా వేస్తుంది. తెలంగాణకు బహుళ-రోజుల ఉరుములతో కూడిన వర్ష హెచ్చరికను జారీ చేసింది. వాతావరణ శాఖ అంచనాల ప్రకారం... ఈ కాలంలో పలు జిల్లాల్లోని అక్కడక్కడా ఉరుములు, మెరుపులతో కూడిన భారీ వర్షాలు, గంటకు 30 నుండి 40 కిలోమీటర్ల వేగంతో గాలులు వీచే అవకాశం ఎక్కువగా ఉందని అధికారులు వెల్లడించారు. 

ఏప్రిల్ 19వ తేదీ నుండి ఏప్రిల్ 20వ తేదీ వరకు ప్రభావిత జిల్లాల్లో ఆదిలాబాద్, కుమురం భీమ్ ఆసిఫాబాద్, మంచిర్యాలు, జయశంకర్ భూపాలపల్లి, ములుగు, భద్రాద్రి కొత్తగూడెం, వికారాబాద్, సంగారెడ్డి, మెదక్, కామారెడ్డి తదితర జిల్లాలు ప్రభావితమయ్యే అవకాశం ఉందని తెలిపింది. ఏప్రిల్ 20–21 తేదీలలో, ఉత్తర, మధ్య తెలంగాణలోని పలు ప్రాంతాలతో పాటు, కరీంనగర్, పెద్దపల్లి వంటి జిల్లాల్లోనూ ఇటువంటి వాతావరణ పరిస్థితులే నెలకొంటాయని అంచనా వేస్తున్నారు.

ఏప్రిల్ 21–22 తేదీలలో ఇంతకుముందు ప్రభావితమైన ప్రాంతాలతో పాటు హైదరాబాద్, రంగారెడ్డి, మేడ్చల్-మల్కాజిగిరి, మహబూబ్‌నగర్, నాగర్‌కర్నూల్ జిల్లాలకు కూడా ఈ హెచ్చరిక విస్తరించింది. ఏప్రిల్ 22–23 వరకు నిజామాబాద్, జగిత్యాల, రాజన్న సిరిసిల్ల, యాదాద్రి భువనగిరి జిల్లాలతో పాటు ఉత్తర, మధ్య తెలంగాణ వ్యాప్తంగా ఉరుములు మెరుపులతో కూడిన వర్షం కురిసే అవకాశం ఉంది. మెరుపులు, ఈదురు గాలుల కారణంగా కొన్ని ప్రాంతాల్లో తాత్కాలిక అంతరాయాలు ఏర్పడే అవకాశం ఉన్నందున, ప్రభావిత ప్రాంతాల నివాసితులు అప్రమత్తంగా ఉండాలని అధికారులు సూచించారు.